“Ha’u husu ba ita-boot sira, ita-boot sira mak parséiru ministériu nian, ministériu halo ona nia devér, ami-nia devér mak kontratu ho ita-boot sira ona, buat hotu sei la defikulta ita-boot sira-nia pagamentu tanba ita-boot sira manán tender ona, maibé ha’u husu de’it, haraik-an ba ita-boot sira, favór ida tenke sériu para halo dezenvolvimentu serví ita-nia povu di’ak liután, ne’e ita ko’alia kona-ba povu, ita ko’alia kona-ba estadu ne’e ita la’os ko’alia kona-ba osan mean ruma ne’ebé ita labele fó hanoin, ida-ne’e nesesidade ne’ebé báziku tebes ne’ebé ita-nia povu presiza, favór ida ajuda ha’u”, dehan Ministru Abel liuhusi enkontru ho konsultór sira iha salaun enkontru Gabinete MOP, Kaikoli, Dili, kuarta (13/07).

Kompaña sira presiza aselera no dezenvolve dezeñu no BoQ tuir rekezitu sira husi Ajénsia Dezenvolvimentu Nasionál (ADN) nune’e labele defikulta prosesu verifikasaun ba projetu.

Iha fatin hanesan, konsultór sira aprezenta kona-ba projetu ne’ebé ezekuta ona maibé sei problema iha verifikasaun, nune’e Diretór ADN, Renato Mariano Monteiro da Cruz, ho ekipa, ne’ebé partisipa mós iha enkontru ne’e esplika kona-ba rekezitus verifikasaun ba projetu antes finaliza no kontinua prosesu implementasaun no pagamentu ba projetu.

Ministru Abel mós konvida nafatin ADN no konsultór sira atu kontinua diskute iha semana oin hodi ko’alia di’ak liután kona-ba estudu tékniku sira, nune’e bele hadi’a di’ak liután.

Enkontru ne’e, partisipa husi Diretór ADN ho ekipa no konsultór sira, partisipa mós husi Diretór Jerál Obras Públikas (DJOP), Rui Hernani, ho Diretór Nasionál Estrada, Ponte no Kontrolu i Seias (DNEPCC), Milton Ramanata de Castro Monteiro, no tékniku sira. (*)