Tuir informasaun ne’ebé www.tempotimor.com asesu iha pájina MTKI, sesta (10/06) katak, projetus Infraestrutura hanesan parte integrante ida iha Planu Dezenvolvimentu Nasionál 2010-2030. Setór Infraestrutura hanesan parte importante tebes ba Timor-Leste, atubele iha kapasidade hodi dezenvolve a’an ekonómikamente no sosialmente.
Tanba ne’e, hanesan komponente ida ne’ebé importante atu suporta no materializa Planu Dezenvolvimentu Nasionál, Infraestrutura mós hanesan investimentu ida husi setór públiku nomós setór privadu ne’ebé sai parseiru ho Governu.
Ba konseitu dezenvolvimentu ne’ebé sustentável rekere investimentu ne’ebé asertadu ka iha estudu ne’ebé klean.
MTKI liuhusi Diresaun Jerál Komérsiu no Diresaun Nasionál Komérsiu Interna, identifika situasaun atuál hanesan merkadu munisipál barak ne’ebé laiha ona kondisaun adekuadu ba suporta atividade komersiál povu nian iha área rurál, no afeta ba hatun taxa transasaun diária nomós menus vizita populasaun nian ba fatin komersiál hirak ne’e.
Iha ne’e mós haree ba falta ba ordenamentu, ijiene ne’ebé mukit, falta espasu ba labarik sira, toileta ne’ebé laiha ona kondisaun no falta organizasaun ba estasionamentu no seluk tan, hanesan fatór sira ne’ebé kontribui redusaun atividade komersiál iha áreas rurál.
Tanba ne’e inklui fatin hanesan sira seluk mak Merkadu Munisipál Lospalos, Merkadu Munisipál Baukau ho Merkadu Munisipál Ermera.
Nune’e selebra kontratu servisu entre MTKI ho Maidol I,Lda hodi halo projetu Dezeñu Enjeñaria Detalladu (DED) ba Merkadu Munisipál tolu.
Iha selebrasaun kontratu ne’e, Ministru Turizmu Komérsiu no Indústria, José Lucas do Carmo da Silva, husu Konsultór Maidol I,Lda atu kria nafatin komunikasaun di’ak ho Ministériu nune’e bele hatudu rezuldtadu ne’ebé di’ak.
Diretora Konsultór Maidol I,Lda, Yustina Naga hatete, parte husi konsultan la promete buat oioin ba MTKI maibé hakarak hatudu de’it rezultadu dezeñu ne’ebé di’ak.
Entretantu, Konkursu públiku ba projetu dezeñu enjeñeria ne’e hahú anúsiu ona iha 2021 no iha loron 27 fulan-abril 2022, MTKI anúnsiu ona manán na’in prosesu konskursu ba kontratu iha Komisaun Nasionál Aprovizionamentu (CNA). (*)
