Tuir informasaun ne’ebé www.tempotimor.com asesu iha pájina ofisiál Minitériu Obras Públika, kinta (21/04) katak, Ministru Obras Públika Abel Pires fó orientasaun ba Supervizór sira husi Diresaun Nasionál Estrada, Ponte no Kontrolu no Seias (DNEPCC) ho kompaña konstrutór Jonize Unip. Lda, atu servisu ho óras extra hodi aselera projetu reabilitasaun ne'e tuir dezeñu no kontratu ne'ebé iha.

Ministru MOP hamutuk ho Ministru MTK halo mós observasaun direita ba Terminál Tasitolu no fó orientasaun ba Diretór Jerál MTK ho ekipa tékniku sira atu muda Terminal refere ba área João Paulo II nian.

Konstrusaun projetu estrada Rai-Kotu to'o Tasitolu ne'e kategória projetu emerjénsia bazeia ba deliberasaun Konsellu Administrasaun husi Fundu Infraestrutura (KAFI) iha loron 2 abril 2022, no KAFI mós deside ajudikasaun direita kompaña Jonize hodi halo konstrusaun.

Projetu konstrusaun ba estrada iha Tasitolu ne'e emerjénsia bazeia ba justifikasaun MOP atu konstrui iha tempu badak hodi labele hamosu inundasaun nomós preparasaun ba Komemorasaun Loron Restaurasaun Indpendénsia Timor-Leste 20 Maiu 2022 inklui Tomada de Posse ba Prezidente Repúblika (PR) foun períodu 2022-2027. (*)