Sekretáriu Estadu Kooperativa (SEKOOP), Elizário Ferreira hatete, Feira ne'e hala'o durante loron rua hahú husi (13 to’o 14/04) ne'ebé realiza iha FHM, vizita ne'ebé hala’o husi Diretór Kooperasaun Ekonomia ASEAN nian atu halo levantamentu ba ekonomia kreativu sira iha Timor bainhira adere ba ASEAN Timor prepara tiha ona atu kompete iha merkadu livre.

"Objetivu husi vizita nee atu halo levantamentu ba kreatividade ita-nia populasaun nian, nune’e parte kooperativa organiza feira hodi hatudu va delegasaun katak ita preparado atu tama ASEAN, ita-nia movimentu kooperativa preparadu atu oferese nia produtu iha merkadu ASEAN”, dehan nia ba Jornalista sira iha Salaun Federasaun Hanai Malu, Lanud, Bairropite, Dili, kuarta (14/04).

Ho ida ne’e, atu garantia produtu sira ne'ebé loke iha feira hodi kompete iha merkadu ASEAN la’ós SEKOOP mesak atu garante maibé iha mós ministériu seluk hanesan Ministériu Turizmu Komésiu no Industria (MTKI) no Ministériu Agrikultura no Peska (MAP).

Tanba Timor-Leste tama ASEAN oinsé bele promove komunidade sira-nia produtu la'ós de'it iha nível nasionál no rejionál maibé promove mós ba internasionál.

Normalmente iha situasaun hanesan ne’e SEKOOP nafatin akompaña, monitoriza no superviziona atu kreatividade bele iha nia kualidade, kuantidade no sustentabilidade atu nune’e bele iha espasu ne’ebé mamuk hodi bele asegura merkadu ida bele sustentavel e efikasia.

Nune’e, garante atu kompete iha merkado ASEAN, la’ós servisu SEKOOP de’it maibé servisu entre SEKOOP, MTKI no MAP hodi halo promosaun, edukasaun atu nune’e povu ne’ebé hanesan produtór bele, produz ho kualidade, kuantidade no iha sustentabilidade ba futuru.

Produtu sira ne’e mak hanesan Tais, sasán ne'ebé komunidade sira homan inklui kreatividade seluk hanesan artezenatu inklui produtu sira seluk, produtu sira ne'ebé homan ho liman kategária ba empreendedorizmu.

Diretór Kooperasaun Ekonomia ASEAN, Berlianto Situngkir, husi Ministeriu Negósiu Estranjeiru Repúblika Indonézia hatete, nia sente kontente bele partisipa iha feira ne'ebé mak realiza husi SEKOOP.

“Ha’u kontente tebes bele mai partisipa hodi observa direita feira ne'ebé realiza husi kooperativa sira iha Timor, ida ne'e hatudu katak Timor-Leste bele ona halo tuir trend ne'ebé agora dadaun nee dezenvolvidu, espesifiku liu iha ekonomia kreativu”, hatete nia.

Produtu sira ne'e sai hanesan produtu kretaivu husi povu Timor-Leste ne'ebé presiza fó apresisaun no presiza tau atensaun hodi apoiu nune'e bele dezenvolve ho di'ak liután husi parte kualidade, kretividade no inovasaun, nune'e bele esporta ba rai liur hodi bele atrai investór husi rai liur, atubele dezenvolve di’ak liután produtu kreativu sira.

Ba feira ne'e bele haboot liután, nune'e bele enkoraza tan kreatividade husi autór ekonomia kreativu ne'ebé inklina-an iha kooperativa oioin iha Timor-Leste.

Prezidente Kooperativa Hikis Kosar Hadia Moris (HIKHMOR), Lurdes Mendonça Ramos hateten, lori sira-nia produtu ai-farina, senoura aprezenta feira ne'ebé SEKOOP realiza.

‘Produtu husi Kooperativa Kreditu Uniaun HIKHMOR (Hikis Kosar Hadia Moris) husi Munisípiu Aileu produtu ne'ebé mak ami lori mak mak hanesan kerupuk aifarina, senoura, no halo mós aifunan”, dehan nia.

Kooperativa Kreditu Uniaun HIKHMOR durante ne'e halo ona distribuisaun produtu sira ba oja sira, maibé iha tempu pandemia hapara ona kontratu, dadaun ne'e servisu hamutuk filafali no loja Leader. (*)