“Kona-ba subsídiu ba imi front line sira, ami mak foti ba foti hanesan ne'e ona, kuaze deputadu hothtou foti ida ne'e, mais tanba saida mak seidauk sai, ha’u mós bingung fali, pois ha’u tenta saida tok pois para sira tenke fó”, dehan nia ba www.tempotimor.com iha Parlamentu Nasional, sábadu (2/4).

Lista jornalista ba liña frente ne'e, Ministériu Asuntu Parlamentár no Komunikasaun Sosiál rekolla desde iha tinan 2021, la aprezenta ba Ministériu Finansa tanba problema naran no konta bankária.

Nune'e iha loron (25/03), Ministru Asuntu Parlamentár no Komunikasaun Sosiál (MAPKomS), Francisco Martins da Costa Perreira Jerónimo, submete ona ba Ministériu Finansa atu halo verifikasaun ikus hodi halo pagamentu.

Ministru Asuntu Parlamentár no Komunikasaun Sosiál (MAPKomS), interinu, Juvinal Mericio Akara hatete, nia parte seidauk bele fo komentariu kona-ba kestaun subsidiu lina frente, tanba Ministru Francisco sei iha hela estranjeiru.

Tanba ne'e, hein de'it bainhira Ministru fila mai mak foin bele tur hamutuk ho Sekretáriu Estadu Komunikasaun Sosiál (SEKomS) atubele haree kestaun ida ne'e.

Ba problema liña frente, tuir informasaun ne'ebé www.tempotimor.com rekolla katak, Ministériu Finansa dadaun ne’e seidauk bele halo pagamentu ba jornalista lina frente sira, tanba lista jornalista ne'ebé submete husi Radiu Televizaun Timor-Leste, Empreza Públiku (RTTL.ep) sei iha problema.

Tanba ne'e, hein Ministru Asuntu Parlamentar no Komunikasaun Sosiál, Francisco Martins da Costa Pereira Jerónimo, bainhira fila husi Estranjeiru hafoin bele rezolve lista jornalista RTTL.ep hafoin bele haree halo pagamentu. (*)