“Sim ne'e responsável husi SEKOOP tanba orsamentu ne'e mai husi orsamentu Estadu ne'ebé mak sai husi Sekretária Estadu e ami akompaña servisu ne'ebé mak ita-nia membru kooperativa sira halo atu nune'e ita hatene kona-ba ninia rezultadu ba membru sira hodi kontinua haree ninia dezenvolvimentu”, dehan Diretór Jerál ba Promosaun no Dezenvolvimentu Kooperativa, Francisco Xavier ba www.tempotimor.com iha nia servisu fatin Bairopité, segunda (04/04).
Jestór Rekursu Umanu Kooperativa Klibur Uniaun Kréditu (KUC) ne'ebé responsável ba distribuisaun Karosa, Joni Batista Soares hatete, durante ne'e funsináriu sira kontinua halo monitoriza ba karosa ne'ebé mak Sekretária Estadu Kooperativa Distribui ona.
“Iha ne'e, ha'u-nia staff sira kada fulan sira ba tagi ne'e sira ba haree kedas iha balun halo iha tempu kalan, sira fa'an kona-ba hahán sira ne'e sira ami-nia staff sira monitoriza nafatin, sira fa'an sasán hanesan baibain hanesan negosiante nian duni”, informa nia.
Maibé kona-ba rendimentu ne'ebé hetan husi membru kooperativa sira bainhira uza karosa hodi fa'an negósiu ne'e sira-nia rendimentu hanesan baibain.
“Sira-nia rendimentu hanesan baibain haree tuir ema ne'ebé sosa ne'e, sira la fó hatene sira-nia rendimentu, sira so fó hatene de'it kuandu iha kada fula-fulan ne'e sira ne'e membru kooperativa nune'e sira empresta nune'e kada fulan sira hatama tuir montante ne'ebé ami fó hatene ona ba sira tuir pedidu emrprestimu ne'ebé iha”, esplika nia.
Membru kooperativa ne'ebé mak durante ne'e husu atu prepara filafali karosa ne'ebé mak presiza tau filafali dinamu atu nune'e fasilita membru kooperativa sira hodi fa'an sira-nia sasán sira.
“Iha balun ne'ebé mak husu ba ninia satisfas mak karosa ne'e iha fatin de'it tanba membru barak mak feto entaun labele la'o distánsia dook entaun sira tenke fa'an iha Tasitolu, sira atu muda mós sasán todan ne'e mak foin daudaun ami iha inisiativa ida ko'alia fali Dom Bosco para hadi’a fali uza dinamu para ajuda sira hodi sira bele la'o movel ba mai”, hatete nia. (*)