Ministru Prezidénsia Konsellu Ministru (MPKM), Fidelis Leite Magalhaes hatete, Governu deside ona subsídiu fixu ba Xefe Suku no Aldeia sira ho montante $150 to’o $250.

“Projetu atu normativu ida-ne’e, subsídiu fiksu sira ba Xefe Suku sira sai husi dolar amerikanu 140 ba 250, subsídiu fiksu sira ba Xefe Aldeia sira sai husi dolar amerikanu 100 ba 150. Valór husi subsídiu operasionál ba kontratasaun hodi ausiliár ba apoiu administrasaun Suku sai husi dolar amerikanu 115 ba dolar amerikanu 140 ho valór kada fulan, korresponde ba fulan sanulu, subsídiu dezlokasaun ba membru sira Konsellu Suku nian, sai husi dolar amerikanu 30 ba dolar amerikanu 40. Valór sira seluk laiha alterasaun”, esplika Ministru Fidelis iha Palásiu Governu kuarta (23/03).

Haree ba karater naruk no ezijente husi kolaborasaun entre organizasaun komunitáriu no Estadu, husi kuadru normativu foun ne’ebé introduz husi Lei Suku sira nomós iha prosesu deskonsentrasaun administrativa afavór ba suku sira, hakarak ho diploma ida-ne’e prosede ba atualizasaun rekursu materiál sira no insentivu finanseiru sira hodi atribui ba organizasaun komunitáriu sira.

“Hakarak mós reforsa prinsípiu legalidade, transparénsia no administrasaun di’ak husi rekursu finanseiru sira Estadu nian ne’ebé importa ba área normativa husi dekretu-lei ida-ne’e, definisaun no kuantifikasaun konjuntu husi rekursu no insentivu finanseiru sira atu atribui ba lideransa no ba organizasaun komunitária sira, ne’ebé remete de’it ba diploma ministeriál konjuntu regra sira kona-ba prosedimentu ba utilizasaun insentivu finanseiru sira”, afirma nia.

Projetu Dekretu-Lei, ne’ebé aprezenta husi Ministru Administrasaun Estatál (MAE), Miguel Pereira de Carvalho ba Konsellu Ministru hodi halo diskusaun no aprovasaun. (*)