Dirétor Jéral Sekrétaria Estadu Formasaun Profesionál no Empregu (SEFOPE), Paulo Alves hatete, sira informa ona akordu haruka trabllador Timoroan ba servisu iha Korea Súl no Austrália ne’ebé mai ho akordu entre Governu rua, maibé diferente ho akordu ne’ebé Grupu Incato halo ho kompaña privadu.

“SEFOPE informa ona ba grupu incanto katak akordu ne’ebe haruka traballador timoroan ba servisu iha Korea no Austrália ida ne’e akordu ida ne’ebe ita halo entre Governu ho Governu la’os Governu ho setor privadu ruma. Tamba ne’e, ita presiza haree no tetu didi’ak bainhira haruka traballadór sira ba servisu iha nasaun Qatar. Nune’e Governu lakohi foti risku no presiza diskute klean liután”, deklara Paulo Alves iha Salaun Cannosiana, Bekora, tersa (15/03).

Tanba Governu rasik seidauk iha desizaun fiksu ba Grupu Incanto ne’ebé rekrutamentu traballadór timoroan ba servisu iha Qatar.

“Rekrutamentu traballadór timoroan atu ba servisu iha nasaun Qatar ne'e rezultadu husi partisipasaun timor nia iha Expo Dubai. Ami hasoru malu ona ho koordenadór Expo Dubai sira fó hatene katak iha tempu badak sei iha rekrutamentu ba traballadór timoroan ba servisu iha nasaun Qatar”, dehan nia.

Prosesu rekrutamentu dadaun ne’e, halo husi Grupu Incanto tanba sira assina ona akordu ho setór privadu husi Qatar maibé Governu Timor-Leste seidauk assina akordu ruma ho nasaun Qatar.

Tanba esperiénsia hatudu ona katak saida mak akontese ba traballadór husi nasaun vizinu Indonézia ne’ebé durante ne’e ba servisu iha nasaun Qatar.

Maske ida ne’e, hanesan oportunidade ne’ebe di’ak ba timoroan sira maibé Governu mós presiza tetu no haree didi’ak kona-ba risku ne’ebé traballadór sira hasoru bainhira ba servisu iha nasaun Qatar.

“Tanba ne’e, tenke iha akordu ruma entre Governu Timor-Leste ho nasaun Qatar karik iha risku ruma entaun nasaun rua ne’e toma responsabilidade hotu”, afirma nia.

Maibé prosesu rekrutamentu traballadór ba servisu iha nasaun Kanada no Japaun Governu iha komunikasaun inisiál maibé seidauk iha kontinuasaun.

“Razaun ita enfrenta hela pandemia Covid-19 tanba ne’e mak seidauk iha kontinuasaun maibé ita halo ona komunikasaun inisiál ho Governu Japaun no Kanada”, informa nia. (*)