“Reuniaun ida ohin reuniaun alargada konta mós ho ha'u rasik ho ajénsia sira seluk, hodi diskute kona-ba ritmu kona-ba setór infraestrutura mais ohin hanesan esforsu ida ne'ebé mak xefe do Governu halo fó orientasaun ne'ebé klara kona-ba nesesidade atu servisu ho lalais hodi hetan solusaun ba problema sira ne'ebé KAFI impede hela la la'o servisu iha setór infraestrutura, iha forma seluk dehan katak, objetivu prinsipál mak Xefe Governu orienta direta ba KAFI no ninia komponente no orgaun servisu sira para bele hetan solusaun ba problema sira ne'ebé aselere ritmu servisu nian”, haktuir Fidelis ba jornalista sira iha Palásiu Governu, kinta (10/03).
Iha Reuniaun ne'e, Prezidente KAFI, José Reis la marka prezensa maibé membru no estrutura sira kontinua halo reuniaun alargada ne'ebé prezide husi Primeiru Ministru rasik.
Maske Prezidente KAFI aujénsia maibé iha setór sira seluk iha Ministériu sira ne'ebé lidera husi PM Taur no rezultadu reuniaun ne'ebé pozitivu tebes.
“KAFI iha ne'ebé mak partisipasaun Prezidente Interinu KAFI Ministru Finansas tanba Vise PM José Reis hanesan prezidente KAFI oras ne'e auzente nomós Ministériu Obras Públiku no Ministru Transporte no Komunikasaun”, afirma nia.
Nune’e, iha Fundus Infraestrutura haree mós esforsu Governu nian atu ezekuta projetu sira ne'ebé prevé ba tinan 2022 programa normál annual ba tinan 2022 nian nomós ba hirak ne'ebé mak rezultante sira kalamidade ne'ebé liu ona.
Primeiru Ministru husu ba Ministériu sira ne'ebé mak servisu iha setór infraestrutura atu iha objetivu ida de'it atu koordena di'ak liután nomós ajénsia sira hotu mak atu rezolve problema infraestrutura iha Timor laran tomak.
Husi levantamentu ne'ebé hahú husi pontu situasaun husi tinan 2021 ba mudansa alterasaun legál sira ne'ebé akontese ona inklui prosesu sira hotu ne'ebé la'o iha Governu nia laran iha rohan husi tinan 2021 ne'ebé identifika problema infraestrutura konkretu sira.
“Iha ne'ebá mosu problema ida ne'ebé konsidera nu'udar impedimentu sira entaun ho ida ne'e ita bele dehan ohin ne'e hamenus diagnosa ida problema sira hotu, maibé ninia natureza ne'e aponta diretamente ba problema sira eziste ho solusaun ba problema ne'e”, deklara nia. (*)
