“Ohin señor deputadu foti iha deskusaun kona-ba Diploma, ami hanoin ami sei haruka kedan karta ba señor Ministru Edukasaun Juventude no Desportu (MEJD) atu haree tanba saida mak diploma ne'e atraza, atu fahe ba alin sira”, dehan nia iha plenária PN, tersa (15/02).
Tanba preokupasaun ne'ebé levanta husi deputadu kona-ba distribuisaun diploma ne'e importante tebes ba estudante sira mós presiza atu uza hodi kontinua sira-nia estudu iha fatin seluk, liliu ba rai liur.
“Iha rai laran dala ruma laiha preokupasaun maibé iha rai liur presiza iha surat tahan ida ne'ebé mak dekreta ou hatete katak sira ne'e remata ona kursu iha nivél sekundáriu ou iha nivél báziku”, hatete nia.
Iha mós problema seluk hanesan saláriu ba profesór kontratadu ne'e parte MAPKomS mós sei informa ba Ministru Edukasaun Juventude no Desportu atubele haree kestaun ne'e.
Tanba saláriu ba profesór kontratadu ne'ebé seidauk selu ne'e presiza iha avaliasaun, atu fó kontratu ba funsionáriu ida kuandu avaliasaun laiha, ninia servisu ne'ebé nia hatudu mak laiha kualidade no ladun di'ak, mak ministériu fó de'it kontratu ne'e laloos.
“Entaun presiza iha avaliasaun, e antes avaliasaun remata mak foin bele selu fali sira-nia saláriu. Tanba avaliasaun tarde oituan, ha'u hanoin situasaun ne'ebé mak halo iha Ministériu e ha'u hanoin profesór la'ós loron rua de'it, profesór rihun ba rihun, entaun avaliasaun sira hanesan ne'e mós dala barak difikulta”, hatete nia. (*)