"Até a data, ita foin mak iha fulan-abril liu ba foin mak simu tres mil resin, ita fahe ona, mais maioria alunu sira ne'e seidauk hetan kaderneta, hahú husi 2017-2018-2019-2020 kuaze tinan-5 ona ita laiha kaderneta”, dehan Diretór Servisu Edukasaun Munisípal Baukau, Augusto Ornai Ximenes, iha nia kna'ar fatin Tirilolo-Baukau, tersa (04/01).

Tanba ne'e, Edukasaun Munisípal oriente diritiva eskola sira utiliza de’it kaderneta provizóriu (legél) hodi prenze estudante sira-nia valór ezame.

"Maibé ita kontinua hato'o liuhusi reuniaun ruma iha nasionál”, afirma nia.

Eskola barak mak estudante seidauk iha kaderneta hanesan edukasaun sentral ne’ebé presiza tau atensaun.

Koordenadór Eskola Ensiñu Baziku Filiál (EBF) Kaibada Makasa'e, Domingos Freitas hatete, Ministéiru Edukasaun Juventude no Despostu (MEJD) tenke responde ona preukupasaun durante tinan-5 ne'ebé eskola sira hasoru kona-ba kaderneta.

"Iha ami-nia eskola mós estudante barak seidauk iha kaderneta, ami prenze de’it ba suratan mutin sai provizóriumente fahe de’it iha tempu distribuisaun kaderneta”, informa nia.

KoordenadoraEFB Uaikulu Guruça, Maria Cesaltina Gaio hatutan, eskola refere nia estudante husi primeiru anu to'o sestu anu to'o ohin loron seidauk iha kaderneta orijinál.

"Ami liuhusi diretór ensiñu báziku sempre hato'o relatóriu kaderneta laiha ne'e ba esdukasaun maibé laiha rejultadu”, hatete nia.

Tanba ne'e, kontinua ezije ba MEJD atu responde prekupasaun kaderneta kada eskola nune'e bele fasilita profesór sira-nia servisu. (*)