Tempotimor (Díli) – Universidade Nasionál Timor Lorosa'e (UNTL), Tersa (03/09/19) halo formalizasaun ba biblioteka dijitál hodi estudante sira bele asesu ho gratuita.
Reitór UNTL, Francisco Miguel Martins hatete seremonia formalizasaun biblioteka dijitál sai pasu dezenvolvimentu institusionál ida atu dezenvolve UNTL ba oin.
"Liuhosi formalizasun biblioteka dijitál ne'e, atu halo ita-nia universidade UNTL sai di'ak liután iha prosesu dezenvolvimentu nasionál, liuliu atu eleva nia kualidade akademika institusionál," tenik Francisco Miguel Martins iha UNTL, Tersa (03/09/19).
Reitór ne'e haktuir, estudante sira bele asesu livru ho gratuita, nune'e bele fasilita estudante sira hodi poupa osan ba hola livru nian.
"Ita formaliza ona biblioteka dijitál online ne'ebé alunus sira la presiza sosa livru, bele asesu gratuita husi simcard Telkomcel," Miguel informa.
Iha fatin hanesan, estudante husi Fakuldade Direitu, Jeronimo de Oliveira sente orgullu ho Telkomcel nia apoiu ba estudante sira.
"Nu'udar estudante, ha'u orgullu tebes ho Telkomcel nia apoiu, bele fasilita ami estudante hodi asesu ba livru no mós meius komunikasaun seluk. Tanba liuhosi meus komunikasaun hirak ne'e, bele eleva kualidade edukasaun iha UNTL," Jeronimo hatete.