Husi na'in-15 ne’e, kompostu husi espesialidade Cardiolojía 3, terapia intensiva 4, nefrolojía 3, neurolojía 1, endocrinolojía 2, no imagenolojía 2.
Maibé, iha prosesu repatriasaun ne'e, kansela dala rua ona sein justifikasaun husi Governu Timor-Leste bá médiku sira.
Herculano Seixas dos Santos nu'udár Koordenadór Bolseiros médiku espesialistas Timorenses iha Cuba, afirma, tuir planu repatriasaun ne’ebé Grupu Interministerial hato’o liuhusi Embaixada Timor-Leste iha Cuba mak, iha loron 12 fulan-janeiru tinan 2021.
Parte Bolseiru sira simu informasaun ne’ebé grupu interministerial hato’o liuhusi email ba embaixada Timor-Leste iha Havana katak, sei fila mai Timor-Leste, iha loron 2 fulan-fevereiru tinan 2021 ho Voo umanitaria, ruta Havana- Paris–Lisboa-Londres-Dubai, no loron 7 fulan-fevereiru Kuala-Lumpur-Dili.
"Iha momentu ne’ebá prosesu koordenasaun la’o regular, ami mós submete lista no kopia pasaporte, Embaixada mós trata ami-nia vistu, ikus mai viajen refere realiza duni maibé, ami-nia naran exkluidu husi lista viajen la hetan klarifikasaun lolos kona-bá razaun saida mak ami-nia naran exkluidu husi viajen refere”, haktuir iha komunikadu ne'ebé www.tempotimor.com asesu iha loron, segunda (15/03).
Iha planu Voo primeiru kansela, nune'e iha fali loron 3 fulan-fevereiru tinan 2021, sira simu informasaun via email ne’ebé haruka husi grupu interministerial ba embaixada Timor-Leste iha Cuba katak, sei repatriasaun iha loron 12 fulan-marsu tinan 2021.
"Informa katak, ami bolseiru médiku espesialistas na'in-15 sei hala'o viajen ho EuroAtlantic ho ruta Havana - Lisboa día 12 Marsu 2021 no Lisboa Dili día 14 Marsu 2021", afirma nia.
Maibé, prosesu koordenasaun la'o fulan ida resin, no resubmete kopia pasaporte no lista viajen, nune’e mós hala'o kontaktu kuaze loroloron ho embaixada hodi husu informasaun kona-bá prosesu koordenasaun ba viajen refere.
"Nune’e informasaun ne’ebé ami simu durante fulan ida resin mak hanesan durante primeira to’o segunda semana fulan-fevereiru 2021, embaixada Timor-Leste iha Havana informa mai ami katak tuir informasaun ne’ebé simu husi Grupo interministerial lideradu husi Ministériu Negósiu Estranjeiru hatete, orsamentu ba ami-nia billete alokadu ona husi Fundu Dezenvolvimentu Capital Humano (FDCH), maibé ajensia sonhando mak seidauk hato’o pedidu oficsial ba Governo Timor-Leste, tanba ne’e husu ami atu pasiensia nafatin hodi hein”,
"Resposta ne’ebé ami simu desde loron 18 fulan-fevereiru to’o primeira semana fulan-marsu katak, orsamentu ba ami-nia billete alokadu ona, ami-nia billete mós rezervadu ona, hein de'it governu halo aprovasaun ofisial ba voo refere, depois mak Fundu Dezenvolvimentu Kapitál Humanu (FDCH) sei hala'o pagamentu ba ami-nia billete”, haktuir nia.
Grupu interministerial afirma mós katak kestaun téknika kona-ba viajen laiha problema, maibé iha loron 8 fulan-marsu tinan 2021, bolseiru sira ho curiosidade hakerek email ba jerente ajensia Sonhando hodi husu informasaun kona-bá billete no programasaun definitiva ba Voo EuroAtlantic.
Nune’e ajensia sonhando responde katak, bazeia ba pedidu husi embaixada Timor-Leste iha Lisboa, ajensia Sonhando halo ona rezerva ba médicku na'in-15 nia billete, maibé sira seidauk simu resposta ka konfirmasaun husi entidade ne’ebé responsabiliza ba pagamentu.
Ajensia mós konfirma katak, partida euroatlantic husi Lisboa - Dili ne’ebé planeadu ba loron 14 fulan-marsu 2020 aprovadu ona husi Governo Timor-Leste. Ajensia mós konfirma katak, Ministério Edukasaun Timor-Leste halo ona pagamentu bá profesór portugués sira-nia billete, maibé médiku sira seidauk.
"Día 10 Marsu 2021 dader ami rasik konfirma ho Embaixada Timor-Leste iha Havana kona-bá asuntu refere, no resposta ne’ebé ami simu mak Ministério Transporte e Telecomunicações seidauk fó aprovasaun ba voo refere, tanba pista Aeroporto Prezidente Nicolao Lobato ladiak”, dehan nia.
Iha loron 10 fulan-marsu parte kalan oráriu Cuba nian no iha Timor-Leste loron 11 Marsu dader mak foin simu konfirmasaun lolos hato’o husi grupu interministerial ba Embaixada Timor-Leste iha Havana katak, voo refere hetan ona aprovasaun husi Governu, no bolseiru sira tenke halo kedan teste PCR (Covid-19) no trata vistu Fransa nian iha 24 horas nia laran, nune’e bele halo viajen husi Havana-Lisboa loron 12 Marsu 2021 kalan.
"Dia 11 Marsu dader orariu Cuba nian, ami hamutuk ho Embaixada Timor-Leste halo esforsu atu trata vistu fransa nian maibé, infelizmente la hetan aprovasaun, tanba Embaixada Fransa nia prosedimento presiza demora mínimo 72 horas no sira presiza ami aprezenta uluk billete antes halo aprovasaun ba vistu. Realidade ne’ebé akontese mak mesmo que ami bele rezolve teste PCR (Covid-19) iha 24 horas nia laran maibé vistu ami labele hetan iha 24 horas nia laran tanba tempu la to’o no ami mós seidauk simu billete”, argumenta nia.
Ikus mai bolseiru iha Cuba labele halo viajen, tanba grupu interministerial fó konfirmasaun tarde liu, no iha últimas 24 horas (dia 11 Marsu 2020) la biban trata vistu, halo teste PCR (Covid-19) no la hetan billete hodi bele halo viajen tuir planu ne’ebé definidu ona ba loron 12 fulan-marsu tinan 2021.
"Ami exkuidu iha voo ne’ebé previstu iha fulan-fevereiru sem hetan klarifikasaun ruma husi grupo Interministerial ne’ebé kordena asuntu refere. Ami nafatin exkluidu husi voo EuroAtlantic ne’ebé previsto ona ba día 12 Marsu 2021 tanba, falta koordenasaun di’ak entre grupu interministerial no Ajensia Sonhando”, kestiona nia.
Ho razaun hirak ne'e, sira husu ba komisaun Interministerial ne’ebé trata viajen atu hadi'a di’ak liután koordenasaun no komunikasaun ho Embaixada Timor-Leste iha Havana no ajensia ne’ebé responsabiliza ba viajen. (*)
