"Kona-ba manifestasaun ne'e rasik, husi parte Uma-Kreda nian ami la hatene buat ida no ami laiha koñesimentu kona-ba ne'e", dehan Arsebispu Metropolita, liuhusi komunikadu ne’ebé fó sai husi Igreja.
Don Virgílio hatutan, maski sarani TL tomak rona ona notísia Igreja atu partisipa iha manifestasaun, maibé to'o iha momentu ne'e husi konferénsia episkopál laiha hanoin no planu ruma atu halo manifestasaun.
Nia afirma, autoridade másimu Igreja nian maka konferénsia episkopál iha TL hodi deside partisipa ka lae, tanba ne'e karik bainhira identifika ema ruma mak ba partisipa, ida ne'e nia hanesan ema individu no la lori Uma-Kreda nian naran tanba laiha autorizasaun.
"Deskoñese totál informasaun sira ne'ebé la'o iha média", tenik Don Virgílio.
Nia dehan, Uma-Kreda deklara katak laiha hanoin no hakarak ida atu halo manifestasaun ruma relasiona ho informasaun ne'ebé espalla iha públiku dehan Igreja atu partisipa iha manifestasaun hodi hatún PR Lú Olo.
Lider másimu Igreja Katólika iha Timor-Leste ne'e dehan, bainhira informasaun ne'e tama to'o ba iha autoridade seguransa no sivíl sira nia tilun karik, husu atu verifika uluk lai ho autoridade Uma-Kreda nian molok fó sai ba públiku. (*)