Tanba orsamentu ne'ebé Goveru aloka ba MEJD iha tinan 2023, hamutuk millões US$30, ne'ebé kompostu husi Orsamentu Jerál Estadu (OJE) 2023, aloka ba enfraestrutura edukativa millões US$15 inklui fundu empresta millões US$15 husi banku mundial.
Husi orsamentu millões US$30, MEJD fó kalkulasaun, sei kontrui no reabilita tán eskola hamutuk 300 iha teritóriu laran.
"Ami fó kalkula besik 700 sala ba estudante, Bainhira to'o fim do mandatu salas da aula besik 1500, ho eskola hamutuk 500, mais espera buat hotu la'o di'ak, tinan ida ne'e tinan badak, prontu ita la'o tuir planu", dehan nia hafoin hamutuk ho Primeiru Ministru, Taur Matan Ruak inaugura projeitu PKRIE faze dahuluk hamutuk 94 iha EBF Maukale, Suku Gariuia, Postu Administrativu Baukau Vila, Sesta (27/01).
Husi orsamentu millões US$30 ne'ebé atu konstrui tán sala ba estudante 700, Ministéru sei halo identifikasaun ba eskoka públiku sira iha área remotas ho kondisaun grave, maibé la taka dalan mós ba eskola katóliku sira iha área rurais, tanba edukasaun mak save importante ba futuru nasaun nian.
Alende mós, husi orsamentu millões US$30, maske seidauk bele responde pursentu 100, maibé bele responde ona ba preokupasaun edifisiu eskola nian to'o pursentu 80 iha tinan 2023 nu’udar mandatu ikus Oitavu Governu Kostituisionál.
"Ha'u hateten, husi orsamentu US$30 millões ne'e, ita talvez kobre ona serka de entre pursentu 70-80, pursentu 30 seidauk hotu", nia afirma
Enkuantu iha tinan 2021 oitavu Governu Konstituisionál aloka orsamentu hamutuk millões US$29 ne'ebé bele konstrui no reabilita eskola hamutuk 228 iha teritóriu nasionál.
Husi númeru eskola 228, hahú lansa fatuk dahuluk iha fulan-fevreiru tinan 2022, to'o fulan-dezembru tinan 2022, eskola hamutuk 94 mak remata uluk, kompostu husi konstrusaun foun-89 no reabilita-5 ne'ebé ho sala estudante 290, hariis fatin 81, sala ba profesór 7, inklui laboratórium 2, ho nia ezekusaun orsamentu hamutuk millões US$12.8.
Entretantu PKRIE ne'ebé seidauk halo inagurasaun, tuir planu sei inagura iha fulan-marsu tinan 2023. (*)