Hafoin to'o iha Aeroportu Internasional Prezidente Nicolao Lobato Komoro, ba Jornalista, Kardeál Foun Dom Virgílio konfesa katak, semana-rua tan, delegasaun ida husi Vatikanu sei mai vizita Timor-Leste hodi inaugura edifisiu permanente Nunsiatura Apostólika Santa Sé iha Motael, Dili.
“Semana rua tan iha dia 19 sei mai substitutu ida husi Vatikanu Arsebispu Pemggapara ne'ebé maihusi Vatikanu, nia mai iha ne'e sei halo inaugurasaun ba iha Nuseutura”, dehan Kardeal Foun Dom Virgílio iha sala VIP Aeroportu Internasional Prezidente Nicolao dos Reis Lobato, Komoro, segunda (05/09).
Kona-ba pozisaun Timor-Leste ba dokumentu Fraternidade Umana ida-ne'e foin dadauk la konsege trata diretamente iha Vatikanu tanba ajenda badak loos.
Maibé kontinuasaun husi dokumentu ida-ne'e mak vizita ne'ebé delegasaun Vatikanu halo mai Timor-Leste aumesmu tempu sei halo m’os lansamentu ba dokumentu Fraternidade Umana ne'e ba Timor-Leste.
Tanba dokumentu ida-ne'e hanesan pasu konkretu ne'ebé Timor-Leste halo dadauk no sein dúvida ba timoroan sira hodi afirma dala ida tan katak Amu Papa nia domin hatudu mai timoroan atu la'ós ho ibun de'it maibé Timoroan mós hatudu jestu konkretu oinsá hodi kolabora atu implementa dokumentu sira ne'ebé Amu Papa oferese ba mundu tomak.
Tuir ajenda, delegasaun husi Vatikanu mai Timor-Leste sei husik tempu loron ida atu halo semináriu Internasional ka simpózimu kona-ba Fraternidade Umana iha universidade Katólika Dili. (*)