“Vaga ne’ebé MEJD sei loke ba profesór voluntáriu sira tinan ne’e mak hamutuk rihun-rua-atusida (2.100) nian de’it. Vaga ne’e mai husi profesór sira ne’ebé mate ona, aleizadu no balun rezigna-an, balun ba fali fatin seluk no balun ba ona servisu iha rai liur”, dehan Ministru Armindo, bainhira akompaña MAPKOMS hala’o diálogu ho komunidade sira iha Uaimori, Vikeké, ne’ebé www.tempotimor.com, asesu iha pájina MEJD, kuarta (29/06).
Tanba iha tinan 2021 no 2022 Ministériu halo ona reeverifika dadus profesór voluntáriu iha Timor laran tomak rejista hamutuk ema rihun-lima-resin.
Nune’e planu rekrutamentu ba Profesór sira ne’e MEJD aprezenta ona ba Konsellu Ministru hodi aprova proposta refere, atu hala’o prosesu refere.
“Foin semana rua liuba, MEJD aprezenta proposta ne’e ba Konsellu Ministru, kona-ba prosesu posibilidade oinsá mak bele priense vaga rihun-rua-atusida ne’e”, afirma nia.
Tanba ne’e, fulan-agostu MEJD prosesu profesór voluntáriu hirak ne’e hodi prosesa tuir kritéria ne’ebé MEJD define ona, nune’e iha fulan-setembru, buat hothotu la’o loos ona, bele halo kontratasaun ba profesór voluntáriu ba kontratadu, hamutuk 2100 no restante rihun-tolu-resin MEJD labele halo sira-nia kontinuidade.
Bainhira informasaun sai, sira ne’ebé voluntáriu priense rekezitu MEJD sei halo reverifikasaun dadus hodi halo rekrutamentu ba Profesór 2.100 ne’ebé sei mai. (*)