Items filtered by date: Tuesday, 04 May 2021

Tempotimor (Dili)-Sekretária Estadu Kooperativa (SEKoop) koopera ho kompaña telekomunikasaun Telemor hodi fasilita dizitalizasaun kréditu ba membru Koperativa Crédito Unian (CU) ho sistema ‘mosan’.

Published in Ekonomia

Tempotimor (Dili)-Kooperativa Crédito União (CU) durante tinan 18 iha ninia ezisténsia rejista ona membru hamutuk 1345 iha Timor-Leste.

Prezidente kooperativa Crédito Uniăo (CU), Raimundo José Neto hatete, kooperativaa hari’i iha fulan-juñu tinan 2003, husi sira na'in-25 de'it, maibé oras ne'e tama ona ba tinan 2021, iha totál membru hamutuk 1345.

Kona-ba kapitál ladun fiksa, maibé tuir relatóriu trimestrál ne'ebé sempre relata ba Sekretáriu Estadu Kooperativa (SEKoop) iha kapitál ne'ebé ativu no pasivu.

“Ida ne'e, ami bele dehan hamutuk ona US$600 mill ona. Pasivu ne'e, buat sira muda ba aset sira ne'e. Ativu mak osan kest ne'e iha 300 ital mill ne'ebé iha hela membru sira-nia liman”, dehan Raimundo hafoin partisipa iha sorumutuk entre SEKoop ho kompaña telekomunikasaun Telemor iha Akait, tersa (04/05).

Iha dezenvolvimentu kooperativa, sira kontribui ona ba dezenvolvimentu ba pesoál no grupu, kontribuisan ida ne'e, halo parte mós ba dezenvolvimentu nasionál.

“Ita fasilita envezde populasaun ba halo emprestimu iha banku, ho meius ida kooperativu kréditu ne'e bele fasilita mós. Osan mai husi membru, halibur hamutuk, fó filafali ba membru”, esplika nia.

Kona-ba kritériu atu empresta osan iha kooperativa CU, ladun rigurozu hanesan iha banku sira, no importante tenke sai membru.

Entretantu, kooperativa CU ne'e, rasik oras ne'e lokaliza iha Suku Bidau, Postu administrativu Cristo Rei, munisípiu Dili. (*)

Published in Ekonomia

Tempotimor (Dili)-Sentru Integradu Jestaun ba Krize (SIJK) iha loron 04 fulan-maiu fó sai katak Timor-Leste rejistu ona kazu pozitivu covid-19 foun na'in-129,  ne’ebé mai husu munisípiu Dili 102, munisípiu seluk 27. 

Haree ba kazu pozitivu sira ne’e mak kazu ativu iha hela izolamentu hamutuk 1315, no totál kazu konfirmadu kumulativu iha loron 4 fulan-maiu tinan 2021 (sura husi 21 marsu 2020) hamutuk na'in-2653.

“Kazu detetadu foun na'in-129, husi munisípiu Dili 102 munisípiu seluk 29, mane 89 no  feto 40, iha kazu rekuperadu na'in-69 no kazu ativu 1315”, dehan Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo, tersa (04/05).

Rezultadu husi totál kazu detetadu foun 56 (43,3%) halo teste ho razaun atu halo viajen ba munisípiu ka estranjeiru hafoin deteta pozetivu.

Durante loron rua nia laran hahú husi loron 4 fulan-maiu hamutuk hotu Laboratórium Nasionál Saúde (LNS) halo 105 testes PCR iha Dili ho detallu hanesan, vijilánsia sentinela 62, rastreiu ba kontaktu (Contact tracing) 104, rastreiu aleatoriu (Random Screening) 348, viajen sai husi serka sanitária Munisípiu Dili 422, viajen internasionál 39 no Follow up iha kuarentena 30.

Totál testes PCR ne’ebé halo iha loron 3 fulan-maiu iha Munisípiu sira seluk hamutuk 464, ho detalla mak hanesan  Baukau 163, Ermera 53, Maubisse 133 RAEOA 11, Suai 62 no Vikeke 42.

Teste follow up ba sira iha fatin izolamentu 94 (70 negativu ona, 24 sei nafatin pozitivu). (*)

Published in Saude

Tempotimor (Dili)-Prezidente Komisaun B Parlamentu Nasional trata asuntu Defeza no Seguransa, José Agustinho Siqueira "Somotxo" hatete, komunidade Sira tenke hatene nia dever no obrigasaun hodi kontribui ba estabilidade nasional.

Maske ho kazu Oknum Polísia Nasionál Nasionál Timor-Leste (PNTL) ne’ebé tiru kanek joven na’in-3 bainhira asaltu malu iha aldeia Zero 04, Suku Kaikoli, Postu Administrativu Vera Cruz, Munisípiu Dili, maibé komunidade sira iha obrigasaun atu kontribui ba estabilidade.

"Kazu sira ne'e, presiza mós komunidade ninia kontribuisaun, komunidade mós tenke hatene dever no obrigasaun, kontribui ba estabilidade”, dehan Somotxo iha PN, tersa (04/05).

Tanba, medida sira ne’ebé hanesan sidadaun hotu tuir hakmatek no buka esklarese, maibé to'o tinan barak situasaun nafatin, no medida balun tenke diferente oituan, mak balun sai vítima ba polísia, hafoin bele komprende atu ezekuta.

Maibé, atu hari’i estabilidade ne'e depende ba komunidade, tanba komunidade mós iha diretu no obrigasaun, atu kolabora, maibé la kolabora, la kontribui ba estabilidade konserteza mak medida sira hanesan ne'e mosu.

"Mais medida ida tiru ne'e, la’ós ida arbiru de'it, tanba ne'e mak kuandu investiga didi’ak hanesan simples tiru de'it, hakarak tiru de'it laiha reasaun iha tempu ida ne’ebé mak tiru, ida ne'e konserteza ita-nia komunidade bele lakon konfiansa ba ita-nia autoridade seguransa”.(*)

Published in Politika

Tempotimor (Dili)-Xefe Bankada Uniaun Demokrátika Timorense (UDT) iha Parlamentu Nasional (PN), Francisco David Xavier Carlos, apela ba timoroan horu atu nafatin kumpri regra prevensaun Covid-19.

Tanba pandemia covid-19 ne'e nu’udar inimigu invijivél ne’ebé konsege hamate ema barak iha mundu, inklui mós iha Timor-Leste.

Ho ida ne'e, governu liuhusi rezolusaun deside aplika medida serka sanitária no konfinamentu obrigatóriu ba ema hotu atubele kumpre oinsá mak bele kombate moras refere.

"Ita haree katak, pandemia covid-19 ne'e inimigu ida invijivel ne'é, ita haree oho ema barak ona, e prinsipalmente iha Timor serka sanitáriu, e regra ne’ebé tenke ser kumpre, ita tenke kumpre”, deklara nia iha Parlamentu Nasional, tersa (04/05).

Bainhira sidadaun lakoi nafatin atu koopera no desobedénsia ba regra, sei fó risku maka’as, tanba inimigu invijivel ne'e la haree.

"Ne'e tenta mais possível, talves sidadaun hotu nu’udar timoroan di’ak tenke ser kumpre regra serka sanitáriane'e, se la’e ita bele mate mohu”, dehan nia.(*)

Published in Saude

Tempotimor (Dili)-Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, relasiona ho festa no halibur malu la'ós kompetensia Sentru Integradu Jestaun Krize (SIJK) nian maibé ne'e Kompetensia Polísia Nasionál Timor-Leste (PNTL) atu halo atuasaun.

Tamba SIJK la'ós autoridade polísia, maibé SIJK nia papel ne'e atu koordena hodi fó apoiu no fó informasaun.

"Se ha'u haree jornalista na'in-2 halibur malu iha ne'e, ha'u hanesan Kordenador Forsa-Tarefa ba Prevensaun no Mitigasaun Surtu Covid-19 nian, ha'u só bele hatete ba sira la bele halibur malu, maibé kona-ba baku no duni sai sira ne'e ha'u la iha kompetensia, PNTL mak iha kompetensia”, reafirma Rui iha CCD, tersa (04/05).

Maibé, liga ho sansaun ba ema ne'ebé halibur malu iha sesta bázika no kontra serka sanitária ne'e mós la'ós kompetensia SIJK, maibé PNTL mak iha responsabilidade.(*)

Published in Seguransa Defesa

Tempotimor (Dili)-Governu liuhusi aloka Orsamentu Jerál Estadu 2021 ne’ebé aloka Ba Ministériu Saúde ho montante millaun U$34, inklui da vasina.

"Kona ba orsamentu, ami iha 34 milhões, ida ne'e inklui sosa Vasina iha laran”, informa Ministra Saúde, Odete Maria Freitas Belo iha Faról, tersa (04/05)

Ho orsamentu ne’ebé iha sei aloka servisu sira iha Ministériu, ekipamentu médiku nomós hahán ba pasiénte inklui alojamentu sira.

"Ba Vasina ekipamentu médiku nomós nfatin ba hahán ba pasiénte sira nomós iha dívida balun ne'ebé presiza ita atu selu maibé liliu ba hahán”, esplika nia.

Antes ne'e, Parlamentu Nasionál aprova alterasaun dahuluk ba Orsamentu Jerál Estadu ne’ebé  lori mudansa ba Orsamentu Administrasaun Sentral ho valór osan $ 1.932.543.312 hetan aumentu $ 135, 300.000, Fundu Covid-19 ho valór osan $287.641.793, hetan aumentu $ 256.641.793, Fundu Kontejénsia $ 65.151.800, hetan aumentu $ 41.388.428. (*)

Published in Ekonomia

Tempotimor (DILI)-Deputada bankada Frente Revolusionáriu Timor-Leste no Independente (FRETILIN), Lídia Norberta, kestiona Sentru Intergradu Jestaun Krize (SIJK) ne’ebé menus komunikasun ho Pasiénte covid-19 iha sala izolamentu sira.

Tanba, SIJK halo teste Swab ba PN iha semana kotuk, deteta funsionáriu balun pozitivu maibé sentru intergradu rasik la halo komunikasaun lalais atu izola pasiénte refere hodi labele fó risku ba ema seluk.

"Ema balun pozitivu ne'e iha tiha ona iha semana kotuk, e agora sira ba tiha ona, maibé enfelismente sentru intergradu jestaun krize, kuandu hetan rejultadu la telefone kedan ema ida pozitivu ne'e, so ami Parlamentu mak deteta fali depois haruka lista ne'e mai, e maluk ida ne’ebé pozitivu ne'e, nia mak koopera duni, e nia duni mak ba informa nia-an katak nia pozitivu”, hatete nia iha PN, tersa (04/05).

Ho ida ne’e, rekomenda ba SIJK, kuandu deteta pozitivu husi instituisaun nia ema ruma, tenke halo komunikasaun direta ba pasiénte hodi izola-an.

Maibé labele hatudu rezultadu ne'e iha de'it sentru intergradu, tanba orgaun Parlamentu Nasional ne'e nu’udar instituisaun boot, bele fó risku ba ema ema barak ne’ebé tama sai.

"Tanba maluk ida ne’ebé mak pozitivu foin dadauk ne'e kuitadu, nia lahatene buat ida, e depois nia la'o buat hothotu di’ak hela entaun nia la'o ba mai loron ida tomak to'o fali dader mós nia sei la'o”, afirma nia.(*)

Published in Saude

Tempotimor (Dili)-Prezidente Repúblika (PR), Francisco Guterres ‘Lú Olo’, iha loron segunda (03/05), promulga ona dekretu Parlamentu Nasionál, númeru 34/V ba alterasaun dahuluk Lei Orsamentu Jerál Estadu (OJE) ba tinan-2021 no aprovasaun medida apoiu sosiu-ekonómiku.

Prezidente Repúblika konklui katak Dekretu Parlamentu Nasionál ne’e tuir presupostu no rekizitu ne’ebé iha konformidade ho dispozisaun aplikável Konstituisaun Repúblika no nia Lei sira.

“Kondisaun polítika ba nesesidade, konveniénsia no preménsia nune’e, promulga Lei Orsamentu Jerál Estadu ba tinan-2021", dehan PR Lú Olo liuhusi komunikandu imprensa, tersa(04/05)

Antes ne'e, Parlamentu Nasionál aprova alterasaun dahuluk ba orsamentu jerál estadu ne’ebé lori mudansa ba Orsamentu Administrasaun Sentral ho valór osan US$1.932.543.312 hetan aumentu US$135, 300.000, Fundu Covid-19 ho valór osan US$287.641.793, hetan aumentu US$256.641.793, Fundu Kontejénsia US$65.151.800, hetan aumentu US$41.388.428.

Reseita husi orgaun sira no servisus Administrasaun Sentral husi alterasaun Orsamentu Jerál Estadu ba tinan-2021 sa’e ba millaun US$1.932,5, reseita petrolíferu estimada husi Fundu Petrolíferu mak millaun US$ 1.377,6.

Maske iha aumentu husi reseita, alterasaun ba orsamentu jerál estadu mantein nafatin rendimentu sustentavel estimadu ho valór millaun US$547,9.

Alterasaun lejislativas prinsipal husi Dekretu Parlamentu Nasionál iha relasaun ho Lei aprovasaun Orsamentu Jerál Estadu ba tinan-2021, iha dezembru 2020 tanba medida apoiu estensiva hodi hamenus efeitus negativu husi Covid-19, mota no be-sa’e iha 2020 no inundasaun iha loron 4 Dylan-abril tinan 2021.

"Promulgasaun lei orsamentu jerál estadu no aprovasaun medida apoiu sei fó kbi’it ba Governu atu fó apoiu empregu, subsídiu ba traballadór sira, emprezáriu sira, traballadór servisu doméstiku nian no jerente no administador, kontribuisaun sosial no dispensa kontributiva, subsídiu estraordináriu ba dezempregu, subsídiu estraordináriu ba eletrisidade, subsídiu estraordináriu ba renda, subsídiu ba estudante, moratóriu ba kréditu no seguransa alimentár".(*)

Published in Politika

Tempotimor (Dili)-Portavoz Komandu Jerál Polísia Nasionál Timor-Leste (PNTL), Superintendente xefe Arnaldo de Araújo hatete, tuir regra Konsellu Polisiamentu Komunitáriu (KPK) labele atua fiziku hasoru komunidade sira bainhira mosu problema.

Tanba kazu konfrontu entre jovem iha Bekora, iha loron sesta (30/05) deskonfia hetan baku husi membru KPK bainhira atua situasaun no detein joven na’in-14 iha sela inklu karreta patrollamentu PNTL ida rahun.

"Ida ne'e labele, so polísia de’it mak bele halo atuasaun ba kualker komunidade ida, KPK so bele autorija de’it. Se karik nia hatene ema ne'e, hapara ema ne'e, nia (KPK) lori ema entrega ba polísia, sira labele halo atuasaun liu buat ne'ebé mak polísia nia servisu”, dehan Arnaldo iha Sentru Formasaun Polísia-Komoro Dili, tersa (04/05).

Bainhira mosu dezentendimentu ka konfrontu iha komunidade, funsaun KPK nia halo mediasaun no informa ba PNTL atu atual inklui iha posibilidade uza fiziku.

Maibé kazu konfrontu entre joven suku Mascarinhas no suku Kaikoli inklui kazu konfrontu iha Bekora rasik dadaun iha hela prosesu investigasaun Komandu Munisípiu Dili (KMD) no Komandu Jerál PNTL rasik sei informa ba públiku bainhira hatene ona kazu refere nia kauza.

“Ida-ne'e sei la’o hela e Komandu Jerál sei haree hela e kazu ne'e sei iha hela (Komandu) Munisípiu Dili mak sei hatene ida-ne'e , ita hein iha tempu badak portavóz sei hatene depois informa ba ita-boot sira,"  dehan nia. (*)

Published in Seguransa Defesa
Page 1 of 2
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« May 2021 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Tempo Timor Networks

Online Counter