Sekretáriu Estadu Kooperativa (SEKoop), Elizário Ferreira esplika, sistema dizitalizasaun ne'e, sei fasilita husi kompaña Telemor, maibé hetan apoiu husi United Nations Capital Development Fund (UNCDF).
“Atu adota sistema mosan, atu nune'e atendimentu liña kréditu, emprestimu, depozitu, sira ne'ebé mak kooperativa halo ne'e, bele mós hala'o iha ambitu sistema teknolijika nian”, dehan Elizário hafoin sorumutuk kooperasaun ho kompañia Telemor iha Akait, tersa (04/05).
Ho adotasaun sistema dizitalizasaun mosan ne'e, bele integra ho kréditu union nia sistema rasik, nune'e mós fasilita membru sira atu asesu ba kapitál finanseira.
“Primeiru atu dizitaliza servisu kooperativa nian, segundu atu fasilita transferénsia osan, la'o la presiza lori osan, membru kooperativa sira iha ne'ebé de'it, bele halo levamtamentu ba osan”, dehan nia.
Iha ne’e mós kontrola kona-ba emprestimu ne'ebé mak kooperativa sira distribui ba membru sira, atubele asegura sustentabilidade finanseira no estabilidade ekonómika iha kooperativa laran.
Reprezentante Kompaña Telemor, Plan Takh Yung hatete, Telemor sei koopera ho SEKoop liliu ba kreditu Uniaun sira, oinsa bele dizitaliza sira bainhira membru sira hakarak halo kréditu no simu kréditu liuhusi plataforma ‘Mosan’.
“Ida ne'e liliu atu hafásil sira oinsá sira bele uza sistema halo kréditu, sira bele fó filafali juru no osan emprestimu ba kréditu ne'e rasik. Ida ne'e mós bele hasa'e tan ami-nia progresu kona-ba pagamentu dizitál”, hakotu nia.
Prezidente Kooperativa Créditu Uniăo (CU), Raimundo José Neto hatete, programa ne'e pozitivu tebtebes, maibé depende ba nia implementasaun.
"Buat ida ohin loron tekonolójia avansa, ita mós tenke adapta tuir temonolojia ne'e. Ha'u haree sistema ne'e, ninia fundamentál ne'e, husi manual ba eletróniku, purtantu sistema. Ami prontu, ami-nia ema husi kooperativa uniaun kréditu, durante ne'e ami la'o ona ba sistema elektróniku ona”, dehan nia.
Tuir planu, sistema dizitalizasaun ne'e sei implementa iha fulan-maiu, maibé fó prioridade uluk ba kooperativa kréditu sira iha kapitál munisípiu Dili, hafoin ba munisípiu sira seluk. (*)
