Graduasaun ne'e, sei akontese iha loron 20-21 fulan-augustu tinan-2022, ne’ebé kompostu husi Munisípiu 4 hanesan Lautém, Manatutu, Vikeke no Baukau.
"Graduasaun ne'e, kompostu husi ema 1.524 pesoas husi Munisípiu 4 ne'e, membru kandidatu warga sira sei mai konsentra hotu iha Baukau," dehan Prezidente Komisaun Reguladora Arte Marsiais (KRAM) Octavio Conseição iha resintu Administrasaun Baukau, kuarta (10/08).
Graduasaun membru PSHT iha TL sei partisipa husi Dewan pengesahan ka mestre sira husi Madium Indonesia hamutuk na'in-106, maibé na'in-37 inklui lideransa nasionál PSHT mak sei fó graduasaun ba membru sira hamutuk 1.524 husi Munisípiu 4 iha Baukau.
Tanba ne'e, komisaun organizadora Munisípiu Baukau prezisa halo koordenasaun ho autoridade Munisípal inklui parte seguránsa hanesan Komandu Polísia Nasionál Timor-Leste (PNTL) Baukau no FALINTIN-Forsa Defeza Timor-Leste (F-FDTL) primeiru batallaun ladun hodi haree asuntu seguránsa durante prosesu tomak.
Husu mós arte marsiais seluk hanesan IKS no KORK inklui arte ritual sira atu kolabora ho parte seguránsa hodi asegura membru PSHT nia graduasaun to'o remata, tanba unidade nasionál mak importante ba prosesu hotu tuir mai.
"Ita nia dezenvolvimentu área desportiva importante, interese individu tau tiha ba kotuk dezenvolve ita nia rai, ita fiar maun alin sira sei kolabora sei laiha konflitu," nia argumenta
Parte KRAM enkoraja no fó fiar ba estrutruta arte marsiais PSHT hodi organiza seremonia graduasaun bele susesu hodi hatudu ba mundu Timor mós bele.
Tanba, graduasaun refere hanesan investimentu ida sei fó benefisiu ba povu liuhusi sosa manu aman, hudi inklui malus tahan ho futun, alende mós bele hatudu kapasidade ba nasaun seluk liliu arte marsiais nian katak, TL bele ona organiza aan, sai husi liafuan ne'ebé sosiedade antes prega ba membru PSHT bainhira simu gradua tenke halo juramentu ba mean mutin (bandeira indonesia). (*)