Tuir informasaun ne’ebé www.tempotimor.com, asesu iha pájina FXTL, kuarta (10/08) katak, iha jogu ikus ba Ekipa Mane no Feto Timor-Leste iha Olimpiade Xadrez Mundiál, Atleta Elfiana dos Santos vense ninia oponente maske atleta sira seluk la konsege kontribui vitória.
Iha Jogu Ronda ikus nian ne'e, atleta Elfiana dos Santos hamate liurai oponente ho Naran Chika Pride husi Nasaun Bahamas kuaze oras tolu nia laran.
Hafoin manán iha ronda ikus nian ne'e, atleta Elfiana dos Santos konsege gaña totál pontu individuál 4.
Haree ba rezultadu sira ne’e, Atleta Timoroan na'in-3 hanesan Helder de Araújo ho títulu direta nu'udar FIDE Master (FM) ho pontu 7.5, Atleta Sonizia Tilman da Silva hetan títulu nu'udar Women Candidate Master (WCM) ho pontu 5 no Atleta Elfiana dos Santos hetan mós títulu Women Candidate Master (WCM) ho pontu 4.
Ho títulu foun tolu ne’e, Timor-Leste iha ona atleta ho títulu CM na'in-ida (Tito dos Reis), WCM na'in-rua (Sonizia Tilman da Silva no Elfiana dos Santos) no FM na'in-ida (Helder Soares de Araújo). (*)