Tuir administradór munisípiu Covalima Francisco de Andrade katak, sorumutu ohin hodi ko’alia planu programa dezenvolvimentu 40, ne'ebé antes ne'e defini ona iha administradór sesante, tanba ne'e diskuti fali atu defini no eskolla programa ida ne'ebé sai prioridade liu.

"Totál programa ka projetu ne'ebé mak tama iha prioridade iha 2022 hamutuk 40, bazeia ba ita-nia orsamentu millaun $1.33, ne'ebé ita labele kobre hotu, maibé iha reuniaun tuir mai mak ita foti desizaun loloos ida ne'ebé prioridade, tanba husi projetu 40 ne'e bazeia ba orsamentu hirak ne'ebé temi ona," dehan administradór Francisco ba jornalista www.tempotimor.com iha salaun Suai, Kuata (14/4).

Lideransa ne’e mós husu ba ekipa atu diskute kle’an programa sira inklui haree mós ba inundasun ne’ebé mosu iha semana kotuk.

"Ita haree foin dadaun mosu inundasaun iha semana kotuk, tanba ne'e ita boot sira prezensa ida ne'e hodi halo diskusaun kle’an kona-ba programa dezevolvimentu ne'ebé mak sai prioridade liu batinan 2022 nian," informa nia.

Entertantu observasaun www.tempotimor.com nian iha terenu nota katak, administradór Covalima hamutuk ho ekipa sira diskute barak liu mak kona-ba programa agrikultura, bee-moos, estrada no infraestrutura bázika seluk tan.(*)