"A nível nasionál pursentu 47.1, pursentu Ainaru de'it pursentu 60.3. Ne'e tanba saída?. Labarik moris mai inan sira invez fó kedas susu, sira ba hois tiha fali susu been di'ak nian ne'e dehan ne'e fo'er, labele hois sai tanba susuben primeiru mak imunidade ba labarik”, hatete PM Taur Matan Ruak, iha Ainaro, segunda (10/01).

Nune'e PM hakarak enkoraza ba inan aman no autoridade lokál sira atu hatún mánutrisaun ne'e mak sa'e aas iha Munisípiu Ainaru nian.

"Se ita konsege ida ita bele médiu, entaun favor ida, ita nia oan sira tenke aas liu ita, ita uluk hán la di'ak, mais hira ita kria kondisaun ba oan sira hodi sira-nia saúde di'ak”, afirma nia.

Kona-ba isin krekas iha Munisípiu Ainaru sa'e pursentu lima (5), tanba ne'e agora buka alternativu hatún, mánutrisaun no krekas iha Timor-Leste.

Tanba iha Timor-Leste labarik mak futuru nian, rega beibeik, hodi sira saúde di'ak iha tempu futuru mai. 

"Inseguransa alimentár, ita 56 pursentu, família ke dalaruma la hán refeisaun tolu, balun hán refeisaun rua de'it balun la hatene aban ne'e han saida?”, akresenta nia.

Dadaun ne'e Governu halo ona esforsu, atu ajuda oituan komunidade kondisaun ne'ebé Governu iha.

Alende ne'e mós Autoridade lokál sira mós hatene ona kona-ba nia komunidade hira mak hasoru difikuldade kona-ba hahán nian, presiza tenke ajuda sira-nia moris. (*)