"Ita ida-idak iha ita-nia moris fatin, maibé ohin loron ita ida de'it, sai F-FDTL lutu ba nasaun, imi mai iha ne’e ho misaun rua, misaun ida mak agora imi sai liman kroat povu TL ninia, imi mak sai lutu ba nasaun, imi mak garantia soberania integridade rai doben TL nia, servi o nia estadu, Misaun daruak mak servi imi-nia Família, ida ne'e de'it, o labele serbí tan buat seluk, ida ne'e mak imi tenke hanoin”, deklara Tenente Jenerál Lere, bainhira ba vizita membru F-FDTL foun iha Sentru Treinamentu Metinaro, kuarta (15/12).
Tanba sai F-FDTL iha de'it misaun rua atu tuir, tanba sira ne'ebé dadaun ne'e, iha balun arte marsiál no balun jerasaun patriota partidu nia.
"Tanba saida mak ha'u dehan imi servi família no Estadu, tanba imi iha ne'e balun arte marsiál, imi iha ne'e la'ós atu servi fali imi-nia arte marsiál, imi iha ne'e mós balun jerasaun patriota partidu ninia,mais imi la serve ba imi-nia partidu, imi serve mak imi-nia estadu no Família”, dehan nia.
Servi Estadu ne'e oioin, maibé F-FDTL nia servi mak sai liman kroat no lutu ba nasaun ne'ebé todan no la fasil.
F-FDTL sai Família ida de'it iha Institutuisaun militár nia, laiha loron monu no laiha lorosae ka laiha rai klaran.
"Husu ba imi manán konsiénsia no husu ba imi haluha loro monu no lorosae, imi mesak Timoroan, mesak liman kroat ita-nia povu Maubere nia, hanoin ida ne'e, laiha arte marsiál iha ne'e”, hatete nia. (*)