Pasa revista ne’ebé halo ba karreta no motorizada sira ne’ebé halo movimentu iha estrada públiku no kontra kódigu Estrada.
Sub-Xefe DNTSR, Inspetór Xefe, Inocencio Freitas, hatete, atividade check point ne’e hodi eduka nafatin sidadaun sira hodi respeita kódigu estrada.
“Atu informa de’it, ohin ami halao tuir diretiva operasaun ne’ebé mak ami-nia komandu atribui hodi garante katak ema hotu ne’ebé mak uja estrada públiku tenke kompleta rekezitu hahú kedas husi karta kondusaun nomós asesores transporte nian no ita konsege prende motorizada 10, karreta 5 inklui karreta Guvernu ida nomós dokumentu viatura hamutuk 11”, informa Inocencio Freitas, iha Kuartel Jerál PNTL Kaicoli, tersa (23/11).
Ba infratór sira ne’e maioria laiha karta kondusaun no laiha asesores hanesan xapa matrikula, lampu, no espellu.
“Kona-ba karreta Guvernu ida ne’ebé ohin ita prende ne’e tanba lauza xapa matrikula oin kotuk, entaun ida ne’e ita konsidera infrasaun boot ida mesmu patrimóniu estadu ita tenke prosesa”, afirma nia.
Antes ne’e deputadau sira iha Parlamentu Nasionál mós kestiona kona-ba karreta sira ne’ebé modifika hodi uza lampu sorot iha oin ne’ebé kuandu halo movimentu kalan bele prejudika perturbasaun públiku no asidente ba motorista seluk, entaun ida ne’e mós tama hotu iha área operasionál tránzitu nian. (*)