Tuir Komandante Jeral Polisia Nasionál Timor-Leste (PNTL) Komisariu Faustino da Costa hatete, autór ne’ebé hana ema ho rama ambon iha kapital Dili mai husi membru grupu arte marsiais balun.
"Kazu hana ema ne'e ha'u dehan beibeik katak, kazu sira ne'e mai husi ema sira ne'ebé uluk envolve iha arte marsiais," dehan Komisariu Faustino ba jornalista sira iha Palásiu Prezidensiál Bairu-pite, Dili, Kinta (16/07).
Komisariu ne’e hatete, problema ne’ebé halo autór hana ema kontinua movimentu mak ezistensia grupu arte marsiais.
"Problema ne'ebé halo autór rama ambon sei iha mak arte marsiais, tanba ema balun hakarak iha bairu ida tenke iha de'it arte marsiais ida, maibé Timor ne'e ita labele permite buat ne'e, tanba Timor ne'e ba Timor-oan hotu, ba ema hotu," dehan Faustino.
Hatan kona-ba PNTL kaptura ona autor hana ema iha kapital Dili, Komisariu ne’e hatete, tempu mak sei fó resposta.
"Ida ne'e parte justisa nian, entaun ha'u labele dehan katak autór ne'e ami kaptura ona ka ami hetan ona, maibé tempu sei mai hodi responde ba ida ne'e," dehan nia.