Ne'e duni, vizita kortezia ministru nian ba kada órgaun komunikasaun sosiál atu fó mensajen ba média sira katak governu iha nia interese, tanba ne'e hakarak hakbesik aan ba instituisaun média sira hodi haree no hamutuk buka solusaun ba dezenvolvimentu média.

"Prezensa ha'u-nian atu haree no rona ita boot sira-nia preokupasaun, ne'e sai hanesan meiu ida mai ami atu bele hare hodi buka solusaun hamutuk, liuliu iha planu asaun anuál nian saida mak bele halo ba média sira husi parte governu nian", dehan Ministru Jeronimo, iha sede Business Timor, Kolmera, Sabadu (11/7).

Nia hatutan, governu mós labele hanoin atu fahe osan ba jornalista sira, tanba ne'e problema bele hamosu interpretasaun katak governu sosa jornalista sira no jornalista sira ko'alia mak buat ne'ebé di'ak de'it.

"Ami-nia hakarak ne'e atu mai hasoru ita boot sira, haree ita boot sira-nia problema lori fila ba hodi haree hamutuk, tetu hanusa maka apavel meiu ne'ebé bele fó solusaun ba ita boot sira-nia problema ho dalan ne'ebé loos tuir lei ne'ebé estabelese iha ita-nia rai" tenik nia.

Iha fatin hanesan, Diretór Business Timor, José Maria Ximenes hateten, Business Timor nia iis mak hanesan publisidade kona-ba ekonomia, tanba ne'e husu ba governu atu bele kontribui ba área ne'e tanba média mós sai nu'udar iis ba demokrasia.

"Ami sujere karik governu bele haree formasaun ba ekonomia tanba dala barak formasaun barak liu ba jornalista sira kona-ba polítika, maibé jornalista balun laiha koñesimentu kona-ba liafuan ekonomia," dehan diretor ne'e. (*)