Diretór STAE Munisípiu Baukau, Lucio Freitas Salvador hatete, formasaun atu kapasita brigadista sira hodi kontinua hatutan ba poling staff iha sentru votasaun no estasaun votasaun.

"Prepara sira hodi bele hasoru prosesu ne’ebé sei mai, liu-liu prosesu eleisaun ba Prezidente, prepara didiak sira nia aan par hasoru situasaun ambiente polítika ne'ebé mai, tanba agora eziste kandidatura 16,"dehan Lucio iha CCB vila antiga, segunda (21/02).

Husi kandidatu na'in-16 sei mosu situasaun polítika oin-oin, nune'e liuhusi formasaun brigadista bele responsabiliza iha eleisaun.

Matéria formasaun kona-ba kna’ar brigadista, prezidente no sekrétariu sentru votasaun, inklui ofisiál urna nian.

Nune'e, Xefe Departamentu Rekursu Humanus STAE Nasionál, Adolfo Natalia da Silva hatete, formasaun durante loron 3 bazeia ba lei Nú.15/2021 ne’ebé deside ona, atu brigadista hotu tuir formasaun no bele fahe tutan ba poling sfat sira.

"Materia importante hanesan kna'ar brigada ne'ebé atu aprezenta hanorin ita nia komunidade, poling staf, tenke konsulta Autoridade sira, atu hanorin eleitores sira ba vota loos no tuir regras," nia esplika

Liuhusi formasaun ne'e mós hanorin brigadista sira ho honestidade atu bele garantia iha eleisaun.

Enkuantu brigadista hamutuk na'in-125 iha Munisípiu Baukau ne'ebé tuir formasaun kompostu husi postu Administrativu Baukau Vila, Baguia, Laga, Kelikai, Venilale no Vemase. (*)