“Hodi nune'e, bele hariku, haboot no habokur ita-nia matenek,” SEFOPE hatete bainhira halo abertura Espozisaun Karreira Profisionál, Kinta (22/08/19) iha Salaun Dom Bosco, Komoro.
SEFOPE mós husu para estudante sira bele foti desizaun di'ak ba aban bainrua. Tanba estudante sira mak futuru nasaun nian.
Tuir Julião, iha espozisaun ne'e mós sei realiza semináriu ba estudante sira ne'ebé oradór sira mak eis SEFOPE hanesan, señor Ilidio Ximenes da Costa, señor Nivio Magalhães no Prezidente Autoridade Nasionál Petróleu no Minerál (ANPM), Gualdino da Silva.
Oradór Ilidio Ximenes sei lori materia kona-ba Foin-sa’e Mileniál iha Empregu Entre Dezafiu ho Oportunidade nune'e Nívio Magalhães sei ko’alia sobre Formasaun Profisionál Dalan ba Futuru Juventude nian no oradór seluk hosi Prezidente Autoridade Nasionál Petróleu no Minerál (ANPM), Gualdino da Silva sei ko'alia kona-ba Perspetiva Serbisu iha Indústria Petrolífera. Eis Prezidente Repúblika, José Ramos Horta mós sei sai oradór ne’ebé sei ko’alia kona-ba Poténsia Foin-sa’e Timor-Leste Prepara ba Iklima Empregu Globál.
SEFOPE hato'o ninia agradese ba partisipasaun estudante sira nian iha atividade ne’e. nia dehan, estadu Timor-Leste hanesan nasaun ida sei joven tebes. Tan ne’e foin-sa’e sira presiza dezenvolve an para bele partisipa direta iha prosesu konstrusaun estadu.
“Nasaun ne'e ita mak na’in. Sei hakarak sai na’in loloos, tenke kontribui hodi partisipa iha prosesu dezenvolvimentu,” Julião hatete.
Estudante hamutuk 8.377 ne'ebé mai husi eskola sekundária jerál no tekniku profisionál hamutuk 23 iha kapitál Díli partisipa iha eventu ida ne'e.