Tempo Timor - Kanal Notisia, Husi imi ba imi

Switch to desktop Register Login

Xanana – TMR Husu Misa Homenazen ba Konis Santana Featured

Rate this item
(0 votes)

DILI – Eis komandante em xefe das FALINTIL, Kay Rala Xanana Gusmão ho eis vise Taur Matan Ruak husu misa homenajen ba saudozu Nino Konis Santa nia mate ne’ebé kompleta tinan 20 ona iha loron Domingo, 11 Marsu 2018.

Nino Konis Santa mate iha Mertutu, Ermera iha loron 11 Marsu 1998.

Misa ne’e Kay Rala Xanana Gusmão ho Taur Matan Ruak hamutuk ho Veteranu Kombatente Libertasaun Nasionál mak husu hodi hanoin hikas fali Konis nia mate iha tinan 20 liuba. 

Tuir informasaun ne’ebé Tempo Timor iha katak intensaun hosi misa ne’e atu fó homenazen no atu komemoriza Nino Konis Santa nia loron mate, no fó homenazen mós ba saudozu sira hotu ne’ebé fó sira nia aan tomak ka abnegasaun total ba liberdade nasaun no povu Timor – Leste tomak ne’ebé nu’udar ona nasaun livre no independente iha mundu rai klaran iha loron 20 Maio 2002. 

Misa ne’e akontese iha Dili iha igreja Imaculada Conceição ne’ebé lidera hosi Bispo Diocese Dili, Don Virgílio do Carmo da Silva, SDB iha horas tuku 4 lorokraik. Misa ne’e akontese mós iha igreja sira seluk iha rai laran.  

Jornalista José Antonio Belo ‘Taraleu’ katak foto ne'e halo nia hanoin hikas momentu kmanek akompaña intervista entre jornalista Shusi Koyama hosi japaun ho Nino Konis Santana, iha tinan 1994 iha Mertutu, Ermera. 

 Jornalista José António Belo ho Nino Konis Santana 

 “Iha fulan Marsu tinan1998, Kopassus sei sulan hela ha'u isin iha SGI Kolmera. Iha dadersan ida, iha fulan marcu ninia klaran SGI sira hasai dadur sira husi cela ba habai isin iha loron manas. SGI ninia membru ida dehan ba ami rua maun Loke Matan nune'e, "Komandan kalian, Konis Santana udah meninggal Dunia karena jatuh ke jurang," José haktuir hikas.

 “Fofoun ami rua la fiar mas liu tiha minutu ruma maluk Timoroan ida hosi Lospalos ne'ebé mós hanesan membru SGI, se ha'u la sala ninia naran maun Abilio, hare Kopassus Indonesiu sira ses uitoan nia hakat mai dehan, "Tebes, katuas mate duni ona iha Ramelau." Iha momentu hanesan, ha'u fuan sente nakukun liu fali kalan nia nakukun”.

Nune'e hanoin hikas fali tinan 20 Saudozu Komandante Nino Konis Santana nian mate (11/03/1998 - 11/03/2018). Minutu ida silensiu hodi kontinua fó homenagem, honra no glória ba Saudozu nian sakrifisiu, dedikasaun no abnegasaun total iha prosesu luta ba objetivu lulik "ukun rasik a'an". Deskansa ho Hakmatek. 

Hanesan Presidente Konferensia dahuluk iha loron 01/03/1981 - 08/03/1981, Kay Rala Xanana Gusmão, Membru Sobrevivente C.C.F, hato'o iha nia diskursu dehan: "Não podemos deixar de lembrar todos os valorosos combatentes das gloriosas FALINTIL que tombaram na defesa da integridade da nossa Pátria pela defesa do povo Maubere. Recordamos ainda todos os verdadeiros filhos de Timor-Leste que não negaram o sacrifício da sua própria vida pela Libertação da sua Terra." 

Deputadu Partidu Libertasaun Popular (PLP), Demetrio de Carvalho hakerek iha nia pájina Facebook katak atu hanoin hikas Saudozu Nino Konis Santana nia mate inklui heroi ba patria sira hotu mak ohin iha igreija lubuk ida iha Timor – Leste. 

Nia hatutan, padre sira ne’ebé ohin halo misa ba loron mate Nino Konis Santa nian inklui heroi ba patria sira seluk mak hanesan amu Bispo Diocese Dili, Don Virgílio do Carmo, SDB, amu Bispo Carlos Filipe Ximenes Belo, SDB iha Portugal, amu Justinho, SDB iha Quelicai, amu Abrão, SDB iha Venilale, amu Roberto, Pr iha Baguia, amu Nelson, SDB iha colegio Maliana, amu Berto, CMF iha Kampung Tuti – Komoro, amu Yanpol, CMF iha Salele, amu Norbeto, CMF iha Fohorem, amu Rian, CMF iha Fomento – Komoro, amu Justino, CMF iha kupang, amu Anton, CMF iha Kupang, amu Doni, CMF iha Jakarta, amu Melky, Pr misa iha Betun – Atambua, amu Marcelo, Pr iha Betun, amu Niko iha Jogya, amu Sony, SVD iha kalimantan, amu Carlito iha Roma no amu Marsal, Pr iha Maliana no mós Nailulik sira seluk ne’ebé la konsege temi sira hotu nia naran iha ne'e. 

Bazeia ba informasaun balun ne’ebé Tempo Timor asesu katak Antoninho Santana, ho naran revolusionáriu, “Nino Konis Santana” moris iha povasaun Veru, suku Tutuala, munisipiu Lautem. Moris iha loron 12 fulan Janeiro tinan 1957 no mate iha loron 11 Marsu 1998. . Oan dahuluk husi aman Ze-Makar no inan Poko-Tana.

Iha tinan 1973-1975, estuda iha eskola Canto Resende “professor do Posto Escolar”. Iha tinan 1975, delegado UNETIM (União Nacional dos Estudantes de Timor Leste). Organisasaun joventude FRETILIN iha eskola Canto Resende. Hahú participa ativu iha política. Iha tinan 1975-1977, organização popular da juventude de Timor (OPJT), envia atu dirije kontinuasaun ensino iha Tutuala, maibe la konsege tanba funu, nuné’e halao fali atividade da kampanha alfabetijasaun iha zona Tutuala. Alende ne’e assume mos kargu nuudar responsável ba OPJT.

Iha tinan 1979, hetan kapturasaun husi timor oan armadu nebe servisu ba militar Indonesia, maibe konsege halai tan ba ailaran ho suporta husi timor oan armada sira balu tan. Iha tinan 1977-1979, Delegado do Komisariu (DK), iha setor ponta leste.

Iha tinan 1979-1980, assistente polítiku iha rejiaun Talisma. Iha tinan 1981-1983, iha konferénsia kuadru rejistensia, sai delegado Partido Marxista-Leninista- FRETILIN, koloka iha 3ª kampanha husi 1° Brigada Vermelha. Iha tinan 1983-1991, nu’udar komisariu politiku iha rejiaun militar Sentral, NAKROMAN, hafoin kuadru resistensia mate barak iha 7 setembru 1981, konsekuensia husi operasaun militar Indonésia ba serku no aniquilamento nebe koñesidu ho, OPERASI KIKIS.

Iha tinan 1991-1993, assume kargu komisáriu polítiku Militar sai mos nuudar Vice Secretário Conselho Diretiva da FRETILIN (CDF), hafoin vice Secretário da CDF, Mau Hudu Ran Kadalak hetan kapturasaun iha 1991.

Iha tinan 1993-1998, hafoin kapturasaun Kay Rala Xanana Gusmão iha 1992  no Mau Hunu Bulerek Karatayano iha 1993, Nino Konis Santana assume kargu hanesan tuir mai ne;

  • Chefe do Conselho Militar, Órgaun nebe komandu Luta. Hola parte husi Estado Maior das Falintil no Conselho Diretiva da Fretilin.
  • Secretário do Conselho Diretiva da FRETILIN, kargu nebe Mau Hunu Bulerek Karatayano assume molok despartidarizasaun FALINTIL husi FRETILIN iha 1987.
  • Secretário do Conselho Executivo da Luta Frente Armada (CEL/FA).
  • Secretário do CEL/FC, comite Executivo da Luta Frente Clandestina, hafoin Kery Laran Sabala’e lakon, to’o nian mate iha Mertutu Ermera loron 11 fulan Marsu tinan 1998. (Tempo Timor) 

   

 

 

Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

Website: www.tempotimor.com Email This email address is being protected from spambots. You need JavaScript enabled to view it.

@2018 - Tempo Timor. Developed by Kalohan.net

Top Desktop version