Tempo Timor - Kanal Notisia, Husi imi ba imi

Switch to desktop Register Login

Susesu Negósia Fronteira Maritima Featured

  • Written by 
Rate this item
(0 votes)

   

Bispo Carlos Filipe Ximenes Belo, SDB. 

DILI – Bispo Carlos Filipe Ximenes Belo, SDB hato’o ona parabéns ba negosiator prinsipal Kay Rala Xanana Gusmão hafoin susesu determina liña fronteira tasi nian entre Timor – Leste no Austrália liu hosi asina akordu entre nasaun rua iha Nova Yorke, Amerika iha loron 6 Marsu 2018. 

Tratadu ba Fronteira Maritima asina ona iha sede Nasoins Unidas entre Nasaun rua, Timor-Leste no Australia, dia 6 Marsu, tuku 1700 oras Nova Yorke USA, tempu hanesan iha Dili dia 7 kuarta feira tuku hitu dadersan. Akordu ne’e sei asina hosi Ministru – Adjuntu Primeiru – Ministru nian ba Delimitasaun Fronteira sira, Agio Pereira no Ministra Negósiu Estranjeiru Austrália Julie Bishop. Asina akordu historiku ne’e sei akontese iha Sekretáriu-Jerál ONU, António Guterres, nia oin.

Don Carlos hatete, iha loron 6 Marsu, delegasaun hosi Timor – Leste no Austrália sei asina akordu kona – bá “delimitação de fronteira maritima entre Timor – Leste e Austrália”.

“Hanesan Timoroan ida, ha'u haksolok no hato'o Parabéns ba "Negociador Principal", Maun Boot Kay Rala Xanana Gusmão, ho nia Equipa, ba senhro Ministro Adjunto Dr. Agio Pereira, ba Governo, ba Parlamento no ba Povo Timor Loro Sa'e tomak,” hatete Don Carlos liu hosi nia posting ho ID Facebook Dai Darenafa Namanei, Segunda (05/03).

Maske antes ne’e primeiru – ministru jestaun atual sekretariu jeral partidu FRETILIN, Mari Alkatiri públikamente konsidera atividade Kay Rala Xanana Gusmão nian ba negósia liña fronteira maritima nu’udar peregrinasaun de’it, maibé Don Carlos rekoñese no parabeniza ona Xanana nia susesu durante fulan ualu (8) nia laran konsege hatudu ona rezultadu di’ak.

“Ita agradese ba Na'i Maromak, tan ba ita nia taci (tasi) sai luan tan . . . Ita nia "zona económica" sai boot tan . . . Iha tasi laran no tasi okos riku soin barak. Ita hein de’it, Timoroan sira sai badinas atu "explora", no halo riku soin ne'e ba kontribui ba ita, Timoroan tomak nia dezenvolvimentu kultural, sosial no politika. Ita agradese ba Maun Boot, "Negociador Principal" ne'ebé, ho "perseverança" no" persistência" lori konversasoens sira to'o rohan,” agradese Don Carlos.

“Ita mós agradese ba Governo ne'ebé defende nafatin Timor-Leste nia "direito". Maibé, ita mos iha "dever" ka obrigasaun atu kuida didiak ita nia taci (tasi) no hein ema labele ba na’ok ikan; no ita mós labele, hosi kotuk, simu osan bobot hosi ema seluk, atu he'an ró ba taci Timor, ba na'ok ita nia riku soin sira.Parabéns!,” esplika Don Carlos.

Organizasaun naun – govermental (ONG) La’o Hamutuk sei organiza festa ki’ik atu selebra asinatura ida ne’e, nudár vitória povu nian ne’ebé ema barak buka antes Timor-Leste hetan nia Independénsia.

Entretantu, Ministra Negósiu Estranjeiru Austrália, Julie Bishop katak nia sei vizita Nova Yorke hahu hosi loron 4 to’o 8 Marsu hodi asina tratadu fronteira martima ho Timor – Leste iha kuartel jeral Organizasaun Nasões Unidas (ONU).

“This marks a new chapter in our relationship with Timor-Leste, bringing us together as neighbours sharing a boundary, and as partners and friends,” Julie Bishop. (Tempo Timor)

Last modified on
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

Website: www.tempotimor.com Email This email address is being protected from spambots. You need JavaScript enabled to view it.

@2018 - Tempo Timor. Developed by Kalohan.net

Top Desktop version