Daniel kestiona asuntu ne'e tanba nia hare ona realidade hatudu katak, povu ohin loron difísil atu asesu ba ekonomia ne'ebé sustentável ba sira nia vida, maibé Governu, Parlamentu, Prezidénsia Repúblika hahú hanoin atu hetan salaáriu désimu terseiru.

Nia konta tuir katak, iha loron 10 dezembru 2020, governu liu husi enkontru Konsellu Ministru hala'o ona aprovasaun ba dekretu lei númeru 63/2020 hodi altera tiha lei númeru 7/2018, kona-ba pagamentu estraordinária saláriu désimu terseiru nian.

Daniel esplika, iha dekretu kei fóun ne'e rasik fó ona posibilidade ba governu atu aplika pagamentu estraordináriu, saláriu désimu terseiru iha tinan 2020, ne'ebé sei fó benefisiu hahu husi prezidensia republika, Parlamentu Nasionál, Governu to'o mai funsionaáiu sira.

Diretór ne’e haktuir iha tinan ida uluk saláriu désimu terseiru ne'e, pagamentu bazeia ba lei kódigu laboral, signifika Organizasaun sira ne'ebe la'os parte ba governu de’it, hanesan kompañia, sosiedade sivil sira mak bele simu, maibé agora governu altera tiha no sei la aplika lei ida ne'e.

"lei ida ne'e governu halo saláriu 13 ba funsionáriu sira wainhira iha fin du anu, ne'e governu hare katak governu iha rekursu, entaun saláriu désimu terseiru ne'e aplika ba funsionáriu públiku de’it. Maibé, agora sira altera ne'e hodi aplika ba Prezidente Republika to'o orgaun sira ne'e nomos ba funsionáriu baibain," Daniel hato’o preokupasaun ba www.tempotimor.com iha nia knar fatin Caicoli, Sesta (18/12).

Nia fó ezemplu katak, se karik funsionáriu ida simu saláriu $300, ka $400 mak hetan direitu ida ne'e konsidera sei lójika, maibé hanesan membru Parlamentu Nasionál ne’ebé simu Mil (Ribuan) ba leten pois sira hetan tan saláriu 13, ne'e demais ona.

Nia mos hatutan, agora iha dekretu ne'e sita mós asesór sira atu hetan hotu saláriu 13, ne'e buat ida la merese atu akontese iha estadu ida ne'e.

"Agora sira iha ninia padraun ida ne'ebé sira hakerek ne'e katak, só ema ne'ebé saláriu rihun 5 ba leten mak la simu saláriu 13, signifika ne'e osan hira mak sai, pois at liu tan mak eis titular mós simu hotu,"nia lamenta.

Daniel konta tuir, fóin daudaun governu mós halo proposta ida ho valór orsamentu Millaun $6, atu halo pagamentu ba eis titular, nune'e nia kestiona serake ida ne'e la kontra lei numeru 12 seguransa sosiál.

"Tanba iha lei ne'e hateten katak ema ne'e nia simu ona nia vensimentu ne'e bainhira nia sei ativa kontribui, agora nia eis titular tiha ona, pois nia simu tan saláriu 13 ne'e la'os buat ida demazioza," nia konsidera.

Ho kestaun hirak ne'e nia husu ba públiku, inklui média tenke fahe informasaun ida ne'e ba povu, atu hatene katak, saida mak estadu halo ne'e buat ida naran ita bolu ne'e korupsaun legál, tanba sira halo lei hodi asegura sira nia direitu.

"Entaun problema mak kestaun ida ne'e dada publiku nia interese atu buka hatene hodi hatudu katak buat ida sira hanesan ne’e, tuir loloos labele akontese," nia sujere.

Nia parte preokupa tanba osan alokasaun ba edukasaun ne'e oitoan, alokasaun ba agrikultura ne'e oitoan, maibé osan hodi halo saláriu ba governante sira nian ne'e sira tenke halo lei atu favorese ba sira nia an.

"Ne'e ita lamenta, ita atu moris iha sosiedade ida ho nia lideransa, ka governante no deputadu sira ho karákter hanesan ne'e," nia lamenta. (*)