Ministru Obras Publika Salvadór Soares dos Reis Pires hateten, investimentu iha edifisiu publiku no privadu sei sertifika husi MOP liu husi diresaun nasional sertifikasaun bazeia ba lei organika MOP, nune'e bainhira atu halo konstrusaun ruma tenki akomoda fasilidade ba ema ho defisiénsia.
"Ha’u hasai ona desizaun bazeia ba lei organika kompeténsia Ministeiru nian katak, sertifikasaun se-deit mak liu husi MOP, tenki akomoda ema ho defisiénsia," Salvador hateten iha Palásiu Guvernu Dili, Kuarta (16/12).
Governante ne'e hatutan, atu kompleta diak liu tan maka daudaun ne'e sei hein hela dekretu lei tolu ne'ebé hato'o ona ba vise-pirmeiru ministru no ministru MPO, José Reis kona-ba urbanizasaun no identifikasaun.
Salvadór esplika, bainhira dekretu lei ne’e mak aprovadu ona, MOP sei delibera fali kódiku edifisiu, konstrusaun sivil hodi asegura katak, komponente ne'ebé deit mak atu halo konstrusaun ba edifisiu publiku no privadu tenki akomoda ema ho defisiénsia nia nesesidade.
"Ita iha konsiénsia kona-ba ne'e, ita bo'ot sira hare foin daudaun ami prununsia, publika ona ministru nia despaixu atu relativa ho investementu publiku ba edifisiu publiku sira”. (*)