Lamentasaun ne'e mosu, tanba nia hare katak, orsamentu total millaun $1.4 husi Parlamentu ne'ebé aloka atu sosa karreta ho marka prado ho folin rihun $41, maibé ikus CNA politiza ba sosa fali fali karreta ho marka pajero sport.
Deputadu PD ne'e lamenta oitoan tanba momentu ne'eba nia hanesan Membru konsellu administrasaun, sira aprova osan ida ne'e tanba parte CNA hateten katak, prado ho folin rihun $41 ne'e iha, maibe ikus mai hare la’ós prado maibe pajero sport fali.
"Ha’u mak aprezenta rasik katak, iha pateo nian ne'e ita bele sosa karreta Pajero sport ho folin rihun $41 bele hatun tan. Entaun depois de ida ne'e, inkontru tuir mai fali dehan prado mós iha ona ho folin rihun $41, no ami deside iha konsellu administrasaun, atu sosa prado ho folin rihun $41. Maibé, realidade karreta mai ho pajero sport fali,"deputadu Adriano hateten iha audiénsia públika OJE 2021 iha Parlamentu Nasionál sesta (6/11).
Aleinde karreta, nia hatutan iha mós kestaun labtop, tanba nia hare katak, momentu ne'e PN deside ona hakarak sosa labtop ho marka Aple, maibe realidade komisaun aprovizionamentu ba sosa fali ho marka oin seluk.
"Ami desidi atu hola karreta prado ho folin rihun $41, no labtop Aple,"nia lamenta.
Nia hatutan iha momentu prezidente parlamentu nasional Arão Noe nia tempu, nia foti ona kestaun ne'e liu husi inkontru konsellu administrasaun nian, maibé ate agora laiha resposta.
Ne'e duni, Adriano husu se bele parte ministeriu finansas, ida ne'ebe mak toma konta aprovizionamentu favor esplika kle’an nune'e deputadu sira bele hatene.
