Mezmu lei no majistradu sira aumenta ona, maibé impprtante liu ka alvu ba MP mak oinsa hametin justisa ba sosiedade hotu.
Prokuradór Jerál da Repúblika (PJR) José da Costa Ximenes katak, iha 2007, Ministériu Públiku (MP) iha de'it majistradu na'in 9, laiha ofesiál justisa, lei kona-ba ofesiál justisa mós laiha no iha 2012 mak foin aprova dekretu lei kona-ba ofesiál justisa nian no laiha funsionáriu.
"Ohin, ita iha ona 39 majistradu iha nivél nasionál ne'ebé mesak Timor oan de'it, ofesiál justisa agora iha na'in 95, funsionáriu sira apoiu servisu tékniku administrativu iha ona pelumunus na'in 106 iha nivél nasionál," Dehan PJR José da Costa Ximenes iha edifísiu Ministériu Finansas (MF), Sesta (9/10).
PJR mós afirma, buat ne'ebé sai hanesan baze MP hodi hametin liután la'ós númeru, maibé justisa ba ema hotu.
"Númeru sira ne'ebé iha ne'e ita investe para reforsa instituisaun ne'e para hametin justisa ba ema hotu, entaun ida ne'e mak sai hanesan investimentu forte ba ita-nia rekursu umanu," katak nia.
Nia mós afirma, estatutu ne'ebé MP iha agora, ladun atualizadu ona, tanba tribunál distritál sira mak kareira hotu sira ba tribunál rekursu, entaun oras ne'e juis konselleiru iha na'in lima no prokurador primeiru, segundu no terseiru.
"Prokuradór primeiru to'o terseiru ne'ebé hahú sira-nia kareira iha primeiru istánsia. Entaun ami hanoin katak tenke kria ona grau segundu ne'ebé mak responde ba tribunál rekursu ba istánsia periodu sira iha sistema justisa nia laran" nia dehan.
PJR mós aposta katak tenke iha aproximasaun justisa ba komunidade ne'ebé nafatin bazeia ba regulamentu númeru 11/2000 no 16/2000 kona-ba tribunal haat de'it.
"Tinan 20 liu ona, ita labele presiza de'it tribunál haat ne'e ona, MP nia reprezentasaun iha munisípiu Ermera, Vikeke, Bobonaro nomós Lautem, maibé ida ne'e la sufisiénte, sira iha Manufahi labele buka justisa to'o Covalima," katak José.(*)