Tempotimor (Dili)-Relasiona Orsamentu Jerál Estadu (OJE) tinan fiskál 2021 nian ne'ebé governu liuhusi Komite Revizaun Orsamentu Politika (KROP) halo hela diskusaun, maka Ministru Justisa (MJ) Manuel Carçeres, sei uza tokon $15 ne'ebé MJ hetan ba programa tolu.
Lia hirak ne'e ministru hato'o ba www.tempotimor.com iha edifísiu Ministériu Finansas (MF) Aitarak Laran, Dili.
"Orsamentu 2021 ba Ministériu justisa nia ne'e sei kontinua de'it, fokus liu mak ba formasaun judisiáriu, ne'e tama husi fundu kapitál dezenvolvimentu umanu nian," nia dehan MJ ba www.tempotimor.com, Sábadu (26/9).
Alende ne'e, MJ mós sei foku ba pakote lejislasaun kona-ba lei rai nian.
"Halo pakote lejislativa ida kona-ba implementasaun lei rai, para ita haree took, iha governasaun ida ne'e bele fó ona sertifikadu ba ita-nia maluk sira," nia dehan.
MJ mós dehan, husi polítika esensiál rua ne'e, MJ mós sei haree kona-ba servisu sira ne'ebé bele desentraliza ba munisípiu atu labele bou de'it iha nasionál.
"Haree servisu sira ne'ebé desentraliza ba munisípiu sira ne'e, labele bou hotu-hotu iha Dili de'it. Depois ida seluk mak tenke kontinua Servisu Nasional Kadatrais (SNK) nian," nia dehan.
Entretantu Orsamentu Jerál Estadu (OJE) tinan fiskál 2021 nian ba MJ liu tokon $15. Maibé tanba atu hadi'a prizaun Gleno no Suai, maka MJ sei husi tan orsamentu adisionál balun ba kapitál dezenvolvimentu inklui atu aumenta tan sala aula ba sentru formasaun jurídiku judisiáriu nian.(*).