Xefe Suku agradese ba Sekretáriu Estadu Kooperativa tanba foin primeira membru governu ida hakat to’o iha sira-nia fatin hodi haree diretamente povu nia kondisaun moris.
"Ha'u louva tebes tanba pela primeira-vés Sekretáriu Estadu ida to’o iha área ida rurais ne’e," dehan José bainhira partisipa vizita SEKoop ba kooperativa Agrikultura Lases, iha Aldeia Tatiri, Suku Mulo, Kuarta (19/9).
Nune'e, José hateten, membru governu ida antes barak liu mak lori governu nia naran mas nunka to’o ba komunidade para haree komunidade nia susar, terus no halerik.
José akresenta katak membru governu sira iha nasionál uza komunidade nia-naran mak barak, maibé nunka tun ba baze hodi haree no sente povu nia moris.
"Povu, povu maibé nunka tun mai haree povu, ohin loron ha'u louva tanba nia (SEKoop) to’o hodi haree saida mak akontese iha ami nia aldeia ida ne'e," dehan José.
Entretantu, prezensa Sekretáriu Estadu Kooperativa, Elizário Ferreira, iha Aldeia Tatiri, vizita kooperativa agrikultura Lases, hanesan parte programa husi nia mandatu relasiona ho hasa'e koñesimentu, edukasaun, informasaun kona ba kooperativa inklui dezenvolve ai-han lokál liu husi meius kooperativa. (*)