Ângela konsidera Jenerál Lere ‘cemburu’ tanba la uza ninia fotografia maibé utiliza fali Xanana ninia foto iha sira-ninia asaun.
"Ha'u presiza ko'alia ho maun boot, Komandante Ein Xefe Kay Rala Xanana Gusmão, la'ós maun Lere. Tanba ne'e, la'ós nia foto mak ami tau iha ne'e," dehan Ângela iha sede RNDJK, Bairru Formoza, Segunda (7/9).
Tuir nia, durante ema barak mate la'ós ba Timor-Leste, maibé ba Xanana Gusmão.
"Ema rihun ba rihun mak mate ba naran ida Xanana Gusmão ne'e no ami sira ne'ebé mate restu ne'e kontinua tane nia hanesan Komandante Ein Xefe FALINTIL," tenik nia.
Portavós ne'e husu ba Lere tanba saida mak mai halo fali investigasaun ba foto ne'e.
"Tanbasá sira mak mai investiga fali kona-ba foto ne'e? Ami defende Xanana to'o mate, tanba ida ne'e ami-nia ai-hun, nia mak símbolu unidade nasionál, laiha tan ema seluk," katak nia. (*)