PR Lu Olo liu husi ninia mensajen hatet, Idul Adha la'ós de'it festa ida ba fiar-nain musulmanu, maibé atu selebra mós ho bin-maun-alin hotu-hotu ho fiar ne'ebé de'it.
Nia hatutan, oho karau no fahe uitoan-uitoan ba viziñu, hatudu jestu rekoñese ema nu’udar ema no haforsa relasaun husi ema ba ema.
Tan ne’e, Xefe Estadu hato’o haksolok ba musulmanu sira hotu, liu-husi ninia reprezenta Diretor Jeral Domingos Amaral katak, sidadaun timoroan hela iha Timor-Leste ka iha rai-li’ur. Hato’o mós haksolok ba sidadaun estranjeiru sira ne’ebé selebra Idul Adha, iha rai doben Timor-Leste ka iha nasaun seluk.
"Hanesan tinan-tinan maluk musulmanu sira hakarak tebes selebra hamutuk data importante ida ne’e, Eidul Adha ka loron sakrifísiu hodi fó hanoin profeta Abrão ninia espíritu sakrifísiu. Liu-husi selebrasaun koletiva ida ne’e, maluk sira ne’e haburas ba beibeik fiar musulmanu no solidariedade entre ema," dehan PR Lu Olo liu husi ninia mensajen ne'ebé lee iha meskita kampung Alor, Sesta (31/07).
Maibé, Lu Olo dehan, tanba moras covid-19 hada’et maka’as hela iha mundu, iha rai barak, serimónia signifikativu ida ne’e labele hala’o di’ak tinan ida ne’e, tuir maluk musulmanu sira-nia hanoin no hakarak.
"Nune'e ha’u aproveita festa Eidul Adha nian hodi husu ba fiar-nain musulmanu sira atu ajuda autoridade Timor-Leste eduka alin sira atu hatuir nafatin rekomendasaun husi Ministériu Saúde Timor-Leste: fase liman beibeik, uza máskara no halo distansiamentu social," PR husu.
Hafoin lee mensajen ne’e, Diretór Jerál entrega mós karau ida ne’ebé oferese husi PR Lu Olo nu’udar sentidu solidariedade.
Iha fatin hanesan Vise Prezidente Komunidade Musulmanu Inacio António Soares informa, PR Lu Olo apoiu karau ida ba selebrasaun Idul Adha.
"Apoiu ne'e parte governu balun apoiu orsamentu no sasan hanesan foos, i Prezidente RDTL ohin mai lori karau ida," dehan nia.
Aleinde PR Lu Olo, nia hatete, Sekjer FRETILIN, Mari Alkatiri mós mai hasoru direita hodi apoiu karau ida.