"Nu'udár konsellu iha planu atu lori maun boot sira ne’e tuur hamutuk, maibé ha'u labele dehan katak, aban ka bainrua ami lori sira ba tuur hamutuk, maibé situasaun ida ne'e hahú kedas iha governasaun da-hitu to'o mai agora," Riak Leman hateten lia hirak ne’e, hafoin hamutuk ho estrutura hasorumalu ho Prezidente Repúblika Francisco Guterres Lú Olo, iha palasiu Prezidente Aitarak Laran,Dili.
Riak Leman rekoñese katak, durante ne’e líder nasionál sira la tuur hamutuk no situasaun ne’e sai mós preokupasaun povu iha rai ida ne’e.
"Konsellu iha planu no hanoin hanesan mós komponente hotu-hotu iha Timor-Leste, sosiedade sivíl, amu sira, entidade polítiku sira nia hakarak maka maun boot sira tenke hamutuk”, nia hateten.
Entretantu líder nasionál sira ne'ebé daudaun ne'e presiza atu tuur hamutuk ba futuru nasaun Timor-Leste nian mak hanesan, atuál Prezidente Partidu CNRT Kay Rala Xanana Gusmão, atuál Sekretáriu Jerál FRETILIN Marí Alkatiri, Eis Prezidente Repúblika José Manuel Ramos Horta, atuál Primeiru Ministru (PM) Taur Matan Ruak, atuál Prezidente Repúblika (PR) Francisco Guterres Lú Olo, no Xefe Estadu Maiór Jenerál F-FDTL Majór Jenerál Lere Anan Timur.