Timor-Leste hato'o pedidu ne'e liu husi governu no reforsa mós husi Prezidente Repúblika Francisco Guterres Lu Olo.
"Prezidente Repúblika fiar katak Governu Kuba sei hatan pedidu husi Timor-Leste atu enfrenta efeitu husi Virus Corona," hakerek karta komumikadu imprensa husi palasiu prezidensial ne'ebé www.tempotimor.com asesu, Segunda (30/03).
Iha karta refere hatete, investimentu Kubanu iha área saúde, ohin loron rekoñesidu internasionalmente husi ninia medikemantus no Brigada Médiku ne’ebé haruka ba nasaun barak.
Medikamentus ne'ebé Kuba uza hodi hasa'e imunidade hasoru Covid-19 susesu tebes.
Tan ne'e, PR Lu Olo reforsa pedidu husi VIII Governu Konstitusionál hodi husu asisténsia medikamentu husi Kuba no reforsa Brigada Médika Kubanu iha Timor-Leste.
Entertantu, Timor-Leste iha ona suspeitu pozitivu Covid-19 na'in ida no iha ema liu rihun ida mak tama ona kuarentena.
Relasiona ho pandemia Covid-19, Prezidente Repúblika dekreta ona estadu emerjensia hahú husi 28 Marstu to'o 26 Abril tinan ida ne'e.