Ministru Obras Públika Salvador Pires hatete, hafoin inundasaun mosu iha Sesta (13/03) ponte balun blokeadu tan ne'e presiza atu halo normalizasaun.
"Ita-nia prioridade agora mak hasai sedimentasaun husi mota, tauk karik udan, tanba ita haree ponte balun mota blokeadu bele akontese fali inundasaun ba segunda vez no bele estragus barak liu tan ba populasaun, sira afeitadu tiha ona mais afeitadu liu tan, ida ne'e mak ami sei haree uluk," dehan Salvador iha palasiu governu, Segunda (16/03).
Iha Domingu, nia hatete, ekipa diresaun nasional aqua no saneamentu, hahú kedas iha Taibesi sorin hodi ajuda suru tahu sira ne'ebe bee husik hela.
"Ekipamentus iha 5 ou 6 agora atende hele no mós ajuda mós husi kompaña sira ne'ebé iha, agora hala'o hela hodi tenta normaliza situasaun sira," katak nia.
Nia afirma, dadaun ba oin MOP esforsu nafatin hodi hamoos uluk sedimentasaun hafoin mak haree fali ba seluk.