"Ha'u koalia ho Mari Alkatiri, nia-sentidu kalma loos, nia la kaan podér. Lakohi aproveita situasaun para FRETILIN ukun," dehan Eis-Prezidente Repúblika aumezmu tempu nu'udar mediadór diálogu, José Ramos Horta, ba www.tempotimor.com, iha knaar fatin, Faról, Segunda (17/2).
Ramos konfesa, enkontru entre nia ho Alkatiri konsumu katak, orientasaun FRETILIN nian ba kuadru polítiku sira atu labele ko'alia barak, maibé prontu viabiliza governu foun, nune'e Orsamentu Jerál Estadu (OJE) bele pasa.
"Signifika, Mari Alkatiri, Sekretáriu FRETILIN iha vontade no boa fé," tenik nia.
La'ós ona segredu públiku katak, hafoin OJE 2020 xumba iha Parlamentu Nasionál, impase polítika kontinua mosu no Prezidente Repúblika, Francisco Guterres Lú Olo, daudaun ne'e halo diálogu no hein foti desizaun.
Enkontru entre lider nasionál sira rezulta opsaun balun hanesan fó fila ba partidu polítiku sira iha asentu parlamentár atu buka malu, loke dalan ba FRETILIN atu halo mós koligasaun foun ida ho partidu polítiku balun.
Entertantu, seidauk iha serteza loloos bainhira mak bele iha rezultadu final hodi hakotu impase polítika mezmu eleisaun antesipada nu'udar últimu rekursu. (*)