Reuniaun nee prezide husi Prezidente Repúblika, Francisco Guterres Lú Olo no partisipa husi lider nasionál sira hanesan Mari Alkatiri, José Ramos Horta, Lere Anan Timur no Roque Rodrigues.
Enkontru ne'ebé halao iha Palásiu Prezidensiál, Bairru-Pité nee rezultadu pontu impotante tolu.
Primeiru, partidu polítiku sira ne'ebé iha asentu parlamentár sira hotu-hotu tenke halo movimentu polítiku oinsa mak bele dezeña sira-nia opiniaun no hakarak atu bele hetan solusaun ba impase polítika ne'e.
Segundu, husu partidu polítiku sira iha Uma Fukun Parlamentu Nasionál atu konvoka diálogu no Taur Matan Ruak kontinua Primeiru Ministru to'o hetan solusaun ba impase polítika.
Nune'e, bainhira laiha ona dalan seluk maka foin bele hakat ba rekursu ikus liu eleisaun antesipada.
"Ohin ami na'in hirak halo reuniaun, pontu hirak ne'ebé importante ne'ebé asenta iha reuniaun ida ne'e maka, eleisaun antesipada hanesan rekursu ikus liu," dehan Prezidenti Repúblika, Francisco Guterres Lu Olo, iha Palásiu Prezidensiál, iha Bairru-Pité, Segunda (10/2).
Nia hatutan, hahu husi 20 Janeiru 2020, Prezidenti Repúblika asume totál situasaun ne'ebé akontese hafoin Orsamentu Jerál Estadu (OJE) tinan fiskál 2020 xumba iha Parlamentu Nasionál.
Nune'e, Xefe Estadu kontinua promove diálogu ho partidu politiku sira ho nia lider bankada sira, sosiadade sivíl, veteranu, konviksaun Relijioza no mós ema barak hodi rona sira-nia pontu-de-vista relasiona situasaun polítika ne'ebé atravessa rai-laran.
Entertantu iha diálogu entre lider sira realiza la hetan partisipasaun husi Xanana Gusmão. (*)