Diresaun Jeral Serbisu Migrasaun, Ministériu Interior iha Segunda (03/02) hasai karta informasaun ida ba ajensia hotu-hotu iha aerportu atu labele autoriza ema ho pasaporte Xina tama TL.
"Relasiona ho virus ne'ebé akontese iha nasaun Xina, provinsia Wuhan, orientasaun Ministru (Interior) liu husi Diretór Jeral Serbisu Migrasaun orienta verbal mai Xefe do Posto Aeroportu Dili apartir agora ba oin sei la autoriza sidadaun ne'ebé uza pasaporte Xina tama nasaun Timor Leste," deklara parte migrasaun liu husi karta informasaun ne'ebé tempotimor.con asesu, Segunda (03/02).
Liu husi karta ho data 3 Fevereiru no asina husi Xefe Postu Aeroportu Inspetor Polisia Ernesto Maia ne'e, husu ba ajensia hotu-hotu iha aeroportu atu kolabora.
".... Ami hato'o informasaun ne'e ba ajensia hotu-hotu iha aerportu atu bele kolabora serbisu hamutuk".
Ho desizaun ne'e Timor Leste mós aplika ona regra bandu sidadaun Xina hanesan ho regra ne'ebé nasaun sira seluk implementa ona antes.