Xefe governu AMP ne’e hato’o kestaun ne’e hafoin hasoru-malu ho PR Lu Olo iha Palasiu Prezidensial Bairru-pite, Segunda (20/01).
Hafoin enkontru, PM Taur hatete, bloku AMP laiha ona no pasta Primeiru Ministru sei entrega ba PR Lu Olo atu foti desizaun.
"Ha’u-nia fatin Primeiru Ministru despozisoens ba Prezidente Repúblika, desizaun saída de’it ha’u prontu simu," dehan PM Taur.
Entretantu, tuir Konstituisaun RDTL artigu 112 alineia “b” kona-ba Demisaun Governu nian, PR bele halo demisaun ba governu bainhira simu pedidu demisaun husi PM.
Artigu ne’e hatete: (Demisaun Governu nian akontese) “Bainhira Prezidente Repúblika simu pedidu demisaun husi Primeiru Ministru”.
Daudaun ne’e PM Taur seidauk hato’o ninia karta demisaun maske nia deklara katak AMP la eziste ona.