Ministru Prezidensia Konsellu Ministrus, Fidelis Leite Magalhães hafoin reiniaun Konsellu Ministru iha Palásiu Governu, kuarta (21/12) hatete, projetu ne’ebé hetan ona aprovasaun ne’e aprezenta Ministru Finansas, Augusto Gomes,  ne’ebé aprezenta  projetu Dekretu-Lei ba aprovasaun subsídiu alimentasaun ba traballadór sira ne’ebé ezerse sira nia funsaun iha pontu integradu sira Fronteira no Alfándega nian.

Tanba, konsidera postu Integradu sira Fronteira no Alfándega nian iha períodu espesiál ne’ebé  adapta ba nesesidade espesífika sira ne’ebé mosu husi sira.

Postu sira ne’e lokaliza iha zona ne’ebé dook husi sentru urbanu sira, objetivu atu atribui subsídiu alimentasaun ida ne’ebé atu fó kompensasaun ba kondisaun espesiál serbisu nian husi traballadór sira ne’e, ne’ebé sai at liután bainhira kompara ho kondisaun sira ne’ebé maioria traballadór Administrasaun Públika hetan.

Entretantu Konsellu Ministru delibera, proposta husi Ministru Finansas, Rui Augusto Gomes, atu aprova variasaun ba kontratu konsesaun Portu Baía Tibar nian, hodi halo alterasaun ba objetu kontratu konsesaun, ne’ebé ba oin sei inklui tan obrigasaun konsesionária nian atu sosa scanner ba merkadoria sira, ninia instalasaun no manutensaun durante períodu konsesaun, nune’e mós alterasaun ida iha presu kontratuál, ne’ebé aumenta to’o dolar amerikanu millaun US$4,411. (*)