Nune’e, Ministériu Obrás Públika (MOP) orienta ona Diresaun Jerál Habitasaun no Urbanízmu (DJHU) atu bele hahú halo pagamentu ka indiminizasaun, bainhira lista afetadu sira kompletu ona, tanba MOP asina ona MOU ho BNCTL.
Daudaun mós ekipa iha hela tereñu hodi halo aprosimasaun ho komunidade afeitadu atu asina deklarasaun ba indiminizasaun nian, tanba molok kompaña implementa reabilitasaun ba estrada, presiza konklui uluk pagamentu.
Tuir informasaun ne'ebé www.tempotimor.com asesu iha pájina ofisiál MOP, kuarta (21/12) katak, daudaun komunidade afeitadu ba projetu estrada husi área Uaiaka, Postu Administrativu Kelikai, Munisípiu Baukau ba Suku Nahareka, Postu Ossu, Munisípiu Vikeke, hela família 18 mak seidauk asina deklarasaun ba indiminizasaun, maibé barak asina ona.
Tuir kontratu, projetu reabilitasaun ba estrada diresaun Laga ba Baguia responsabliza husi kompañia Internasionál Norinco International Cooperation LDA ho orsamentu milliaun US$21.695.194.98, durasaun fulan 24.
Reabilitasaun ne'e, tuir planu sei hadi’a ho nia luan metru 7, ho pakóte alkatraun metru 4, alargamentu metru 1, no hetan suprevizaun husi Kompañia PT Inacon Luhur Pertiwi, JV Kai Watu Kmanek Consultant, Unip. Lda, no PT Sinotech Engineering Indonesia.
Projetu reabilitasaun ba estrada diresaun Waiaca ba Nahareka ho nia distánsia kilometru 22+700, ne’ebé sei responsabliza husi kompañia Internasionál Xina, Chongqing International Construction Corporation (CICO), ho montante orsamentu milliaun US$16.547,661,76, ho durasaun tempu fulan 18.
Projetu reabilitasaun ba estrada munisipál Laga-Baguia no Uaiaka-Kelikai-Ossu ne’e, Governu lansa ona fatuk dahuluk iha loron 9 fulan-dezembru tinan 2022. (*)
