"Kooperasaun komunikasaun ho média privadu sira-ne'e hanesan pasu ida importante ne'ebé governu halo atu bele intende malu kona-ba saida mak media sira-nia atividade no saida mak governu nia hanoin atu prienxe iha parte ruma media sira-nia difikuldade", dehan Ministru hafoin finaliza dialogu ho media privadu sira iha Salaun City 8, Manleuana, tersa (20/12).

Tanba ne'e, iha diskusaun média privadu sira bele ko’alia sira nia difikuldade, maske governu labele direitamente apoiu ho orsamentu.

"Maibé, ha'u dehan dala ida tán lei mós fo dalan ba ami atu haree posibilidade seluk ne'ebe bele halo atu apoiu ba ita-nia média sira liu husi dalan legál, entaun dalan legál ne'e iha", nia hatete.

Nune'e, kooperasaun komunikasaun ho média privadu sira ne'e, governu halo atu bele intende saida mak media sira hanoin.

"Enkontru ida-ne'e importante atu hatene pois buka solusaun", nia afirma.

Entretantu kompromisu ne'ebé MAPKOMS hakarak hato'o maka esperiensia ne'ebé governu hala'o tinan-ida-resin ona no sei la'o nafatin ba oin.

"Governu sé de’it mak mai laiha problema, maibé ha'u hanesan Ministru, antes atu termina mandatu, sei entrega memoria instituisionál ida ba iha governu no Ministru ida ne'ebé mak mai, atu hatete ba nia saida mak presiza atu halo ba futuru", nia hatete. (*)