"Ami mós husu ba Prezidente Repúblika oinsá governu no estadu iha-ne'e, fo rekoñesimentu ida ba vítima UDTISTA sira, inosentemente iha tinan 1974-1975 ida-ne'e mak ami hato'o ba PR Horta iha audensia ida ne'e", dehan nia hafoin audensia ho Xefe Estadu iha palasiu prezidénsial, Bairo Pite, tersa (20/12).
Tanba, audensia ho Xefe estadu ne'e, involve mós ho vítima UDTista sira, nune'e ko'alia oituan mós kona-ba pozisaun governu no estadu atu halo prezente no rekoñesementu ba vítima ne'ebé inosentemente.
Durante enkontru, UDT mos aprezenta ba Prezidente Repúblika kona-ba UDT ninia inisiativa hadi’a rate ne'ebé vítima UDTista sira ne'ebé iha Aileu nomós fatin seluk ne'ebé futuru sei haloot sira ho dignu.
Purtantu, parte Prezidente Republika konkorda ona atu haruka tékniku asesor sira oinsa hato'o karta ba governu hodi haree no hodi foti solusaun ruma nomos halo estudu ida ba futuru.
"Ne'e mak ko'alia hamutuk ona, PR Horta mós aseita oinsá mak iha futuru atu bele rezolve situasaun ne'e", dehan nia.
UDT mos sei ko'alia ho líder hanesan Xanana Gusmão nomos lider sira husi partidu FRETILIN kona-ba situasaun ne'ebé dadaun atualiza ona ba PR.
Enkuantu, parte seluk UDT mós hato'o votu agradesementu ba Prezidente Repúblika, José Ramos-Horta, ne'ebe hala'o esforsu durante fulan 7 hodi Timor tama ba ASEAN nu'udar membru 11 ho estatutu hanesan observador. (*)